Dang ei đei pơhlom 100 rơbâu  bơngai Việt Nam tŏk bŏk oei hơrih, pơm jang, hŏk pơhrăm tơ̆ teh đak Anh; oei tơ̆ jâ̆p tơring teh kơ teh đak Anh. Xơnăm 2023, tơbăt 50 xơnăm iung jang tơbôl Việt Nam – Anh, Kơdră jang tang măt păng dôm jơnŭm jang tŏk bŏk oei tơlĕch lơ tơdrong jang tơroi kơ Việt Nam tơ̆ London păng lơ pơlei tơm tih lơ̆m jâ̆p teh đak Anh. Tơroi hăm kon pơlei găh đon bơnôh tơnŏ pơlei pơla, teh đak, ƀok Kơdră teh đak bơ̆n Võ Văn Thưởng akhan, tơdrong jang kơ dôm jơnŭm jang tơgop kăp gĭt lơ̆m tơdrong hơtŏk xơnong jang, anih dơ̆ng kơ bơngai Việt tơ̆ Anh. Ƀok Kơdră teh đak bơ̆n Võ Văn Thưởng hơpơi 'meh, kon pơlei Việt Nam tơ̆ teh đak Anh pơm kiơ̆ ƀlep khôi luơ̆t păng jang hadoi tơnăp hăm teh đak mă kơdih oei hơrih jang xa, pơtoi găn hloh tơnap tap, tơhlăk tơhlĭn vă đei iŏk lơ jơnei 'lơ̆ng rŏ. Mă kăl, athei pơtoi kơhret tơdrong tơguăt tơguăl, tơroh tơpôl kon pơlei, ling weh hăm pơlei pơla kơdih, vei răk tơƀăk mong joh ayŏ hơdrung hơdrĕch po.