Kơdră teh đak bơ̆n akhan, tơdrong mă 2 păh pơtoi pơma đam khul jang, mă kăl noh khul kơpal kơ 2 teh đak, jing kăp gĭt lơ̆m hơtŏk jang tơbôl kơ 2 teh đak. Kơdră teh đak bơ̆n adoi hmach bơnê kơ yă Michelle Bachelet hăm kơchư̆k jang kơpal kơ anih jang găh xơnong pơm tơm kơ kon bơngai kơ Liên hơp kuôk hlôi đei lơ tơgop lơ̆m tơdrong jang atŭm kơ Liên hơp kuôk păng tơpôl apŭng plenh teh. Găh mŭk drăm jang hadoi 2 păh, yă Michelle Bachelet akhan, pơđĭ Việt Nam păng Chile adoi vang jang lơ̆m Jơnŭm jang pơm tơm kơdih kơ kon bơngai kơ Liên hơp kuôk; atŭm vang jang kiơ̆ Tơchơ̆t Jang hadoi tôm tơdrong păng Gơh rơgei găn tơring Thái Bình Dương. 'Nâu jing đon pơkăp atŭm kăpgĭt vă 2 teh đak hơtŏk jang tơbôl lơ̆m khei năr truh. Yă Michelle Bachelet duh pơkăl 2 păh jang hadoi, atŭm jơhngơ̆m pơm kiơ̆ tơchơ̆t atŭm kơ jơnŭm jang apŭng plenh teh kơyuơ tơdrong rơngei păng hơtŏk tơ-iung.