Tơ̆ jơ pơma nuh, Kơdră teh đak Lương Cường pơma hơdăh trong jang ưh đei tơplih đơ̆ng Đảng păng teh đak Việt Nam ling lang pơ ‘nhŏ hơdrol ăn tơdrong atŏk tơiung tơdrong pơvei Việt – Trung; athei 2 Đảng, 2 teh đak hơtŏk tơdrong tơguăt ƀơ̆r đon, jang hơdoi. 

Drơ̆ng nơ̆r hăm dôm nơ̆r pơma đơ̆ng ƀok Kơdră teh đak Lương Cường, Kơdră Quốc hội teh đak Trung Quốc Triệu Lạc Tế pơma hơdăh 2 Đảng, 2 teh đak athei hơtŏk tơdrong juăt pơvei ‘lơ̆ng hơiă, hơtŏk tơdrong jang hơdoi, vang pơjing Tơpôl tơgŭm băl tơ̆ hơnăp ning mônh tôch gĭt kăl, lăp hăm tơdrong đei yoa đơ̆ng 2 teh đak, vang tơgop ‘lơ̆ng ăn tơdrong rơngei, jang hơdoi, tŏk pran tơ̆ tơring păng lơ̆m apŭng plenh teh.