Tơbăt 80 sơnăm Kăch mang khei 8 păng Quốc khánh 2/9, tơ̆ Hnam hôp hăm apŭng plenh teh, Hà Nội, Anih Trung ương Mặt trận Tổ quốc Việt Nam pơgơ̆r Hop akŏm tih, tơƀâp đơ̆ng đe kơdră chĕp kơ̆l Đảng, teh đak hăm bơngai tang măt gơ̆h hơgei kơ kon pơlei.

Pơma tơ̆ jơ tơƀâp, Kơdră teh đak Lương Cường pơma truh tơdrong chĕp kơ̆l pơgơ̆r đơ̆ng Đảng Cộng sản Việt Nam, Mặt trận Tổ quốc Việt Nam hơnơ̆ng vei kơjăp hơnăp jang chinh trĭ tơm, jĭ bơbŭng hnam atŭm, mât 1 ƀơ̆r đon đơ̆ng đĭ đăng kon pơlei lơ̆m tơpôl, dôm hơdrĕch hơdrung, tơdrong lui khop, bơngai Việt Nam lơ̆m teh đak păng tơ̆ teh đak đe, pơjing jơhngâm pran tih tên đơ̆ng tơguăt đĭ đăng hơdrĕch hơdrung.

Kơdră teh đak athei Mặt trận Tổ quốc Việt Nam jơ̆p tơring kơchăng, pơchĕh gơ̆h hơgei hlŏh dơ̆ng lơ̆m tơdrong atŏk tơiung hơnăp, đon rơgei đơ̆ng tơpôl, rim bơngai gơh hơgei lơ̆m kon pơlei, bơngai kon kông, tơdrong lui khop, khul bơngai tĕch mơdro păng bơngai Việt Nam tơ̆ teh đak đe, vang tơgop pơtho pơhrăm tơdrong juăt, tơiung đon jang kăch mang păng hơtŏk đon hơpơi ‘mĕh plang pơyơ̆r đơ̆ng jơhnơr mơlôh hăm tơdrong jang kăch mang ‘lơ̆ng hơiă đơ̆ng hơdrĕch hơdrung lơ̆m chăl ‘nao.