Pơgê brei (3/9), Trung Quốc pơgơ̆r Lêh yak pơrŏ lĭnh tơbăt 80 sơnăm tơblăh jơnei phát xít đơ̆ng kon pơlei apŭng plĕnh teh tơ̆ Cham să Thiên An Môn tơ̆ anih tơm Bắc Kinh. Drơ̆ng nơ̆r krao hơvơn đơ̆ng Tổng Bí thư Ban Chấp hành Trung ương Đảng Cộng sản Trung Quốc, Kơdră teh đak Cộng hòa nhân dân Trung Hoa Tập Cận Bình, Kơdră teh đak bơ̆n ƀok Lương Cường păng khŭl tang măt gĭt kăl Việt Nam vang truh pơm lêh tơbăt.

Pơma kơkuh chơt hơiă tơ̆ lêh tơbăt, Tổng Bí thư, Kơdră teh đak Trung Quốc Tập Cận Bình tơƀôh jơhngơ̆m đon ƀlŏk hơdơ̆r tơdrong plang pơyơ̆r đơ̆ng rim lĭnh so hlôi vang iung tơblăh, kŭm nhen tơdrong tơgŭm đơ̆ng bôl buăl apŭng plĕnh teh ‘meh vă rơngei lơ̆m tơdrong iung tơblăh tơ jră khŭl phát xít. Đang kơ ‘noh, tơdrong yak pơrŏ lĭnh pơgơ̆r tih hăm tơdrong vang akŏm đơ̆ng lơ kơ loăi ƀrơ̆m phao kơtoang ‘nao lơ̆m khŭl lĭnh Rơngei Kon pơlei Trung Quốc ‘noh đei 45 khŭl grŭp akŏm tơ ter trong Trường An. Hơdrol ‘noh, ƀok Kơdră teh đak bơ̆n Lương Cường hlôi vang truh pơm Lêh sơng păng phĭn rup hơdai hăm dôm Kơdră khŭl vang truh pơm Lêh tơbăt 80 sơnăm Tơblăh jơnei phát xít đơ̆ng kon pơlei apŭng plĕnh teh yua đơ̆ng Tổng Bí thư, Kơdră teh đak Trung Quốc Tập Cận Bình pơgơ̆r.