Kơdră tĕh đak Võ Văn Thưởng đei lơ tơdrong jang gĭt kăl nhen: Vang pơm lêh tŏk pơm ƀok Pơtao; tơƀâp păng đei nơ̆r hơiă hăm ƀok Pơtao Charles III; tơƀâp Thủ tướng Rishi Sunak; sơng pơma nuh hăm Kơdră Hạ viện Anh Lindsay Hoyle, Phŏ Kơdră Hạ viện Nigel Evans, Kơdră tơm jang tơbôl James Cleverly, Kơdră tơm vei lăng khul linh tĕh đak Ben Wallace păng lơ bơngai jang lơ̆m Khul kơdră tĕh đak Anh.

Lơ̆m dôm ‘măng tơƀâp, Kơdră teh đak Võ Văn Thưởng păng ƀok Pơtao Charles III, kơdră chĕp kơ̆l tĕh đak, Kuô̆k hô̆i Anh hơnơ̆ng akhan, tơdrong ‘lơ̆ng vă jang hơdoi đơ̆ng 2 tĕh đak Anh – Việt Nam ‘nŏh tôch tih. 2 păh oei pơma tơƀôh đon pơhnŏng vă pơm hơtŏk hlŏh dơ̆ng tơdrong pơvei; drơ̆ng nơ̆r hơnơ̆ng ăn khul năm hơpong tơ̆ băl, mă loi jĭ khul jang tih kơ Đảng, tĕh đak, Nghị viện păng khul kon pơlei. 2 păh oei drơ̆ng nơ̆r jang hơdoi tôch kơjăp păng tơgŭm băl lơ̆m trong jang lơ pang nhen Anh - ASEAN, Liên hợp quốc, Jơnŭm vei lăng tơdrong pơm tơm kơ kon bơngai jăl jang đơ̆ng 2023 - 2025 păng Tơdrong tơchơ̆t jang hơdoi tôm tơdrong, gơ̆h hơgei, klĕch tơring Thái Bình Dương.