‘Nŏh jĭ đe ƀok: Tổng Bí thư, Kơdră tĕh đak Lào adrol ki, ƀok Choummaly Sayasone; ƀok Tổng Bí thư, Kơdră tĕh đak Lào adrol ki Bounnhang Vorachith păng Thủ tướng so kơ tĕh đak Lào Thongsing Thammavong.

Kơdră tĕh đak Võ Văn Thưởng tơƀôh đon hơiă đei tơƀâp đe ƀok Kơdră so, jĭ bơngai boăl tôch kơjăp, đunh đai hăm kơdră păng kon pơlei Việt Nam; bơnê kơ đe ƀok Kơdră chĕp kơ̆l so kơ tĕh đak Lào hlôi plang jơhngâm, đei lơ tơdrong tơgop tih vang hơmet kơjăp tơdrong pơvei tôch ‘lơ̆ng, mât mĭnh ƀơ̆r đon ưh đei tơplih tôch gĭt kăl đơ̆ng Việt Nam – Lào kŭm nhen hơnơ̆ng tơrĕk truh, tơgŭm ăn tơdrong jang tŏk tôm tơdrong lơ̆m tơdrong pơvei, pơm boăl juăt păng jang hơdoi tôm tơdrong kơ 2 tĕh đak.

Kơdră tĕh đak tơƀôh đon lui, hăm tơdrong chĕp kơ̆l pơgơ̆r tôch rơgei đơ̆ng Đảng Kon pơlei Kăch mang Lào, tĕh đak Lào hrôih yak hlŏh tơdrong pơmat tat, roi đunh jang tŏk kơdih roi ‘lơ̆ng, jing hơnŭk hơnoa, kon pơlei Lào ‘nhŏng ŏh roi đunh roi phĭ tơtŏ dơnŏ ‘lơ̆ng păng hiôk chơt.