Pơgê 18/4, Kơdră tĕh đak Võ Văn Thưởng pơjao tơdrong tơchơ̆t pôk hơtŏk ƀok Phạm Quang Hiệu, Phŏ Kơdră tơm jang tơbôl, Kơdră Anih jang kơ tĕh đak găh bơngai Việt Nam tơ̆ tĕh đak đe pơm Bơngai tang măt tôm tơdrong ăn tĕh đak Cộng hòa xã hội chủ nghĩa Việt Nam tơ̆ Nhật Bản, tang măt hloi tơ̆ tĕh đak Cộng hòa Marshall jăl jang đơ̆ng 2023- 2026.

Pơma lơ̆m jơ pơm lêh, Bơngai tang măt Phạm Quang Hiệu pơkăp lơ̆m jăl jang kơdih vă adrin tơgop tôch ai, hơmet pơ ‘lơ̆ng tơdrong pơvei kơ 2 tĕh đak: hơtŏk tơdrong ăn khul grŭp năm hơpong, pơma nuh hăm băl, pơjing tơdrong ‘lơ̆ng, hiôk hian vă pơvih ăn kon pơlei păng anih tĕch mơdro kơ 2 tĕh đak, tơgop pơm hơtŏk tơdrong jang tơbôl găh mŭk drăm.

Bơngai tang măt vă kŭm hăm đe kăn ƀô̆, bơngai jang tơ̆ anih tang măt pơm hơtŏk tơdrong jang hơdoi, tơmât jên man anih jang, pơm trong, atŏk tơiung kơmăy kơmok ‘nao, hơtŏk tơdrong tơplih hăm kơmăy sô̆, jang tŏk rơgŏh ‘lơ̆ng; tưk tơiung tơdrong pơvei ăn kon pơlei, hơtŏk tơdrong jang hơdoi đơ̆ng dôm tơring kơ 2 tĕh đak; hơtŏk tơdrong tơchĕng hơlen, roi tơƀôh, tơiung pơjing Đảng, hơmet kơjăp tơdrong tơguăt mĭnh ƀơ̆r đon tơ̆ anih jang vă gơ̆h jang đang ‘lơ̆ng tơdrong jang đei pơjao.