‘Măng năm tơmang đơ̆ng Kơdră teh đak Võ Văn Thưởng truh tơ̆ Lào hlôi đei truh 18 tơdrong jang tơ̆ Anih tơm Viêng Chăn hăm lơ jơnei hơdăh, pơm đei tơdrong ‘lơ̆ng ‘nao, gĭt kăl ăn tơdrong pơvei jang hơdai Việt Nam - Lào lơ̆m đĭ đăng dôm tơdrong jang hơdai. ‘Măng năm ngôi tơgop tơlĕch jang đei yua dôm tơdrong drơ̆ng nơ̆r gĭt kăl đơ̆ng 2 Đảng, 2 teh đak, mă loi ‘noh jĭ Tơdrong drơ̆ng nơ̆r jang hơdai Việt Nam - Lào jăl jang 2021-2030 păng tơdrong tơchơ̆t găh jang hơdai 2 pang Việt Nam - Lào jăl jang 2021-2025.

Tơ̆ ‘măng năm ngôi ‘măng âu, Kơdră chĕp kơ̆l gĭt kăl 2 teh đak pơma hơdăh dơ̆ng ling lang lăng kăl păng ‘măn tơgŭm hơdrol  lơ hloh ăn tơdrong hơmet ming păng hơtŏk loi dơ̆ng tơdrong pơvei tơbôl tih, 1 jơhngơ̆m đon gĭt kăl păng jang hơdai tôm tơdrong Việt Nam - Lào; lăng ‘nâu jĭ mŭk tơmam kăp gĭt, tơdrong tơm arih oei đei hăm tơdrong jang kach mang kơ 2 teh đak.