Chơt hơiă kơ ƀok Thongsavanh Phomvihane ‘măng mă blŭng năm ngôi tơ̆ Việt Nam kiơ̆ lơ̆m kơ chư̆k jang ‘nao, Kơdră teh đak Võ Văn Thưởng lui ngeh, ‘măng năm ngôi gô pơ trŭt pran kơ tang tơdrong pơvei jang hơdai đơ̆ng Anih jang tơ bôl 2 Đảng; tơgop hơtŏk ‘lơ̆ng hloh dơ̆ng đei yua jang hơdai tôm tơdrong đơ̆ng 2 Đảng, 2 teh đak tơ̆ hơnăp kơnh.

Kơdră Anih jang tơbôl Trung ương Đảng Nhân dân Cách mạng Lào tơbăt, 2 anih jang hơnơ̆ng pơgơ̆r dôm tơdrong jang pơma dơnuh đơ̆ng khŭl; drơ̆ng nơ̆r tơlĕch trong bơ̆jang, jang hơdai lơ̆m sơnăm 2023 păng vang pơma dơnuh dôm tơdrong vang bơngơ̆t truh kŭm nhen tơdrong vă jang hơdai lơ̆m khei ‘năr đơ̆ng rŏng dơ̆ng. Kơdră teh đak athei 2 Anih jang tơbôl 2 Đảng kăl kơ hơtŏk loi dơ̆ng vang tơroi tơdrong hlôh vao lơ̆m đĭ đăng dôm tơdrong jang hăm jơ hngơ̆m đon tơklep lơ̆m tơdrong jang păng ƀĕnh tơdrong ‘mêm ‘nhŏng oh; hơnơ̆ng vang tơroi păng tơgŭm băl lơ̆m dôm hop akŏm tơring păng apŭng plĕnh teh.