Năr apŭng plenh tĕh kơ đe hơiŏh (1/6), kŭm jing năr Kơchơ̆t bek ‘lơ̆ng, lơ̆m 2 năr, ‘năr 1 păng 2/6, Anih tơm vei lăng tơdrong jang pơgang tơlĕch tơdrong jang tơhuch thim vitamin A đơt 1 sơnăm 2023 ăn hơiŏh lơ̆m tĕh đak. Kơdră tơm vei lăng tơdrong jang pơgang Đào Hồng Lan jur dăr lăng tơdrong jang ‘nâu tơ̆ phường Điện Biên, kuơ̆n Ba Đình, Hà Nội. Tơroi hăm Khul jang đơ̆ng Anih tơm vei lăng jang pơgang, Kơdră Anih vei lăng jang pơgang plt Hà Nội Trần Thị Nhị Hà ăn tơbăt: ‘măng mă âu lơ̆m anih tơm đei hlŏh 630.000 ‘nu hơiŏh lơ̆m sơnăm huch vitamin A, tơ̆ 1.744 anih. 

Yă kơdră vei lăng jang pơgang Đào Hồng Lan tơroi, Vitamin A vă tơhuch thim ăn hơiŏh đei anih jang Vitamin Angel – tĕh đak Mi tơgŭm. Khei ‘năr âu ki, tơmam ưh kơmăh kơna kơsô̆ vitamin A ‘măng mă âu đei pơtruh hiơ̆ ƀiơ̆. Tơchĕng hơdrol đei dang 6 triu hơiŏh lơ̆m tĕh đak đei huch dơ̆ng Vitamin A. Hơdrô̆ tơ̆ 22 dêh char groi kông pơmat tat, sơnăm hơiŏh huch vitamin A đei pơih xă ƀiơ̆, đơ̆ng 6 khei truh 59 khei. Găh noh dơ̆ng, hơiŏh đơ̆ng 24 khei truh 59 khei đei ăn huch pơgang hơmơng kiơ̆ năr hơgăt ‘năi. Tơdrong jang ‘nâu hlôi tơgŭm ăn tĕh đak găh đei tơdrong jĭ măt tol yoa ưh kơmăh vitamin A lơ̆m sơnăm 2000.