Vang năm akŏm Lêh xoi ƀlŏk, rim bơngai tang măt năm tơmang anih pơdăh tơmam xo,  tơhiu pơkao tơ̆ đak, atŭm vih tơbăt tơdrong hlôi đei kơ 35 xơnăm adrol ki – Tơdrong tơblăh ăh pơgê năr 14/3/1988 tơ̆ Gạc Ma hlôi đei pơkăp lơ̆m hnưr erih kơ hơdrung hơdrĕch jing minh gru kơnăl ưh lai yơ hiơt lơ̆m đon bơnôh kơ rim kon pơlei teh đak Việt.  Tơ̆ Lêh xoi ƀlŏk, rim bơngai tang măt kŭp yom plang hlôt nhang, plang pơkao tơ̆ anih xoi ƀlŏk păng pơxat ƀlŏk tơbăt kơ 64 'nu linh nuih mơng hlôi lôch plang tơ̆ Gạc Ma. Lơ̆m tơdrong pơdăh joh ayŏ kơdŏ xuang ăh Lêh xoi ƀlŏk, Jơnŭm pơgơ̆r hlôi jang atŭm hăm dôm anih jang axong tơmam ăn 'nhŏng oh linh lôch plang ăn teh đak, axong jên hŏk ăn đe hŏk tro păng pơjao hla kơ Teh đak ăn kon pơlei jang rôp ka hơdang.