Kiơ̆ Kŏng ang dêh char Đăk Nông, dôm xơnăm kơ âu, lơ̆m tơring teh kơ dêh char hlôi đei lơ tơdrong pơm jĭ bơnôh tơrĕk truh phao chă pơm kơdih nhen: năm hơnguang kơlih 'mrâ̆m rơsot trŏ bơngai pơm lôch răm, pơlôch bơngai, tơhĭl pơnăh băl hăm phao kơtuang, tơtông mŭk drăm... Hăm tơdrong đei ƀôh âu, atŭm hăm tơdrong hơtŏk pran tơdrong mă tôm kon pơlei vei lăng xơđơ̆ng tơpôl teh đak, kŏng ang Đăk Nông hlôi hơtŏk tơdrong tơroi tơbăt, hơvơn kon pơlei pơjao phao kơtuang pơm kơdih, kiơ̆ đơ̆ng noh đei iŏk jơnei hơ-iă. Đơ̆ng xơnăm 2022 truh dang ei, jâ̆p dêh char hlôi hơvơn kon pơlei pơjao jê̆ 300 tŏ phao lơ kơloăi, 4 tŏ phao khul linh, 1 tong phao 'măn pơlong tơplŏng kơdâu, 1 pôm găr nat. 'Nguaih kơ noh, khul kŏng ang oei thu iŏk 7 tơmam drăm vă pơm phao, 200gr ngoi đôh, hloh 1.000 tŏ 'mrâ̆m lêk.