Lơ̆m dôm năr âu ki, kơtơ̆ng kon pơlei tơ̆ dôm dêh char găh Tu oei pŭ lơ tơdrong hiong răm tôch dêh yoa đơ̆ng ‘mi kial kơsô̆ 3, mŏ Nguyễn Hồng Tố Diễm, oei tơ̆ plt Pleiku, dêh char Gia Lai răt hơmet 1,2 tơmam xa păng đak nhă vă tơgŭm ăn kon pơlei tơ̆ tơring đak lơ̆p. Dôm tơmam âu đei mŏ chĕp năm tơ̆ anih mong akŏm, tăh hơmet pơ ‘lơ̆ng lơ̆m gre tih vă chơ năm: “Inh hăm mŏ inh, 2 ‘nu măr nhi vang gơih tŏ sĕt tơmam ăn mih ma duch nă tơ̆ tơring ‘mi kial, hơpơi ‘mĕh đe ‘nhŏng oh mă đơ̆ng trong hơtăih kŭm adrin chơ truh ăn kon pơlei tơ̆ noh. Inh kŭm hơpơi ‘mĕh rim bơngai vang tơgŭm ăn kon pơlei tơ̆ dôm tơring pŭ lơ tơdrong hiong răm.”

Tưk tơiung jơhngâm đon ‘lơ̆ng “ Hla ‘lơ̆ng bơ̆ng ăn hla hiăh”, lơ bơngai tơ̆ dêh char Gia Lai athei kơtum kơtŏng ‘nhŏng oh, bôl boăl vang tơgop bơ̆n mi tôm, đak nhă păng pơgang vă gơih tơgŭm ăn kon pơlei tơ̆ tơring đak lơ̆p tơ̆ dôm dêh char găh Tu. ‘Nhŏng Võ Phi Hổ, tơ ‘ngla gre Phi Hổ, kơdâu kiơ̆ trong Gia Lai – Đà Nẵng tơroi, đơ̆ng rŏng iŏk đei nơ̆r krao hơvơn, lơ̆m kơsơ̆ ‘năr 11/9, hlôi đei lơ bơnmgai đei đon ‘lơ̆ng năm truh tơ̆ anih mong tơmam vă tơgŭm lơ tơmam kăl, vang tơgŭm ƀiơ̆ tơdrong pơmat tat mă kon pơlei tơ̆ lơ tơring găh Tu oei tơƀâp:

“Inh chă krao hơvơn vă kon pơlei Gia Lai vang tơgŭm, hơnhăk ba lơ tơmam, jơhngâm đon ‘mêm mơnat đơ̆ng kon pơlei Gia Lai truh hăm kon pơlei tơ̆ tơring găh Tu. Atŭm hăm ‘nŏh, inh oei jang kiơ̆ Khul kơdră tơring, mơng anih gak vei vĕ kơ Anih ngôi pơhiơ̆ Đồng Xanh pơm anih mong akŏm dôm tơmam yoa kăl yoa anih âu đei teh xă păng ưh đei kâm gre tih.”

Lơ̆m ‘năr 11/9 mơ̆n, Kơdră chĕp kơ̆l Đảng dêh char Gia Lai đei hla ar chih athei rim anih jang đảng, khul grŭp tơpôl, tơring tơrang lơ̆m dêh char jăh tơlĕch nơ̆r krao hơvơn vang tơgŭm, chă tơra tơgop tơmam tơgŭm ăn kon pơlei tơ̆ tơring hiong răm lơ. Jơnăr tơlĕch tơdrong krao hơvơn đơ̆ng ang ei truh đĭ ‘năr 13/9/2024. Đơ̆ng kơsô̆ jên chă mong akŏm, Anih MTTQ Việt Nam dêh char Gia Lai hlôi pơjao jên tơgŭm truh 400 triu gơih ăn kon pơlei tơ̆ dôm dêh char găh Tu.

Tơ̆ Đắc Lắc, hăm dôm tơdrong jang tôch hơdăh, kon pơlei dôm hơdrĕch hơdrung tơ̆ Đăk Lắk tŏk bŏk đei lơ tơdrong tơgŭm ăn kon pơlei tơ̆ tơring găh Tu oei pŭ lơ tơdrong hiong răm đơ̆ng ‘mi kial, đak lơ̆p, tơƀôh hơdăh jơhngâm đon ‘mêm băl, mât 1 ƀơ̆r đon, vang tơgŭm băl đơ̆ng hơdrĕch Việt Nam. Tơ̆ apŭng Lăk, 1 lơ̆m dôm tơring pơmat tat dêh hlŏh kơ dêh char Đắk Lắk, tơring đei truh 66% ‘nŏh jĭ kon pơlei kon kông arih xa, kon pơlei oei vang tơgop kŏng, tơgop tơmam pơm "Tơhnŏk ƀoh tŭl hăm ƀum ngô" gơih ăn kon pơlei tơ̆ tơring găh Tu kơplăh oei đei tơdrong pơmat tat âu. Kon pơlei ưh ơm kơ gleh hrat pŭ ƀum ngô đơ̆ng unh hnam pơtăm năm truh tơ̆ anih mong tơmam tơ̆ hnam chuơ Quảng Trạch, xăh Đắk Liêng, apŭng Lắk vang tơgŭm.   

Tơ̆ Kon Tum, Khul kơdră chĕp kơ̆l đoan dêh char Kon Tum krao hơvơn rim anih jang đoan kŭm hăm hlŏh 33.000 ‘nu đoàn viên, druh dăm lơ̆m dêh char vang tơgop, tơgŭm ăn kon pơlei hơmet pơ ‘lơ̆ng hiong răm đơ̆ng ‘mi kial đak lơ̆p. ‘Măng tơra tơgop, tơgŭm ăn kon pơlei pŭ hiong răm đei Anih jang đoan dêh char Kon Tum pơgơ̆r lơ̆m 5 năr, đơ̆ng kơsơ̆ ‘năr 11/9 truh đĭ ‘năr 15/9. Đơ̆ng rŏng kơ lêh tơlĕch, hăm jơhngâm đon ‘lơ̆ng, rim kăn ƀô̆, bơngai jang lơ̆m Anih jang đoan dêh char Kon Tum bu bu kŭm vang tơgop tơgŭm ăn kon pơlei tơ̆ tơring ‘mi kial đak lơ̆p ngăl.

‘Nhŏng Nguyễn Văn Mạnh, Phó Bí thư chĕp kơ̆l đoan dêh char Kon Tum, ăn tơbăt: “Khul kơdră chĕp kơ̆l đoan dêh char hlôi tơlĕch truh tơ̆ rim khul grŭp, anih jang đoan tơ̆ dôm apŭng, plt. Hơdai hăm ‘nŏh kŭm đei 1 kênh jang hơdoi hăm dôm bơngai đei jơhngâm đon ‘lơ̆ng. Dôm anih jang đoan tơ̆ apŭng, plt đei lơ anih mong akŏm tơmam. Đĭ đăng tơmam yoa kăl tơ̆ plt kŭm nhen dôm apŭng mong akŏm tơ̆ cham xă. Đơ̆ng noh Khul kơdră chĕp kơ̆l đoan dêh char pơma nuh hăm dôm anih chơ chuĕn tơmam ưh đei iŏk jên vă chơ tơgŭm tơmam ăn kon pơlei tơ̆ tơring găh Tu, vang tơgŭm ăn kon pơlei tŏk klăih đơ̆ng pơmat tat đơ̆ng ‘mi kial hơ bŭt âu./.