Jơ pơrô̆ pơrôp pơtho tơbăt Tơdrong jang Jơ plei tĕh sơnăm 2023 kơ yuơ Khul Đoàn Kong ty Kmăi ŭnh hơyuh Kon Tum pơgơ̆r hơvơn vang năm đơ̆ng hloh 900 ‘nu oh hŏk tro Hnam trương Jăl kơđeh-Jăl bbar Đak Bla, pơlei tơm Kon Tum. Tơdrong hơ iă hloh ‘noh dôm nơ̆r pơn pơchơt đei hơpăh đei ƀơm trugh tơdrong pơkom ŭnh hơyuh, nhen: iŏk yua ŭnh hơyuh pơkom lơ̆m lăm hŏk, ŭnh hnam; chă pơting kơƀŏng tơtoach lơ ŭnh hơyuh … rim đe oh jei tơl ƀlep păng tôch kơ koăng. Oh Chu Thị Thanh Tuyền, hŏk tro lăm 9D tơbăt:“Đơ̆ng rŏng pơgơ̆r au oh băt hơdăh hloh dơ̆ng găh tơdrong hơ iă kơ Jơ Plei tĕh vă pơkom ŭnh hơyuh vei lăng cham char hoei tơplih tŏ ‘mi kial. Oh jei đei tơdrong jang vă pơkom ŭnh hơyuh nhen oei tơ̆ hnam trương dăh mă tơ̆ hnam ‘noh tơpit pơđĭ ŭnh hơyuh mư̆h pă đei iŏk yua, nhen lĕch đơ̆ng lăm hŏk ‘nŏh pit ŭnh hơyuh, tơpit koat, pit tivi. Oh hơpơi dôm tơdrong au gô tơgŭm tŏ sĕt lơ̆m vei lăng năng tông cham char hoei pơm kơnê̆ truh tơplih tŏ ‘mi kial”.

Hăm hơnăp jang yŭk trong hơlau, Hơnih jang ŭnh hơyuh Kon Tum hlôi đei lơ trong chă pơrô̆ pơrôp, pơtho tơbăt trŏ lăp hăm kon pơlei. Sơnăm au sơkơ̆t hơdăh tơdrong chă pơtho tơbăt ‘nŏh tơ̆ đe hŏk tro, hơnih au iung jang hơdoi hăm hnam trương pơgơ̆r pơtho tơbăt ăn đe oh. ‘Ngoăih kơ ‘nŏh pơtho tơbăt, pơrô̆ pơrôp hăm panô, áp phích, băng zôn… păng lơ̆m Web, mạng tơpôl, trang fanpage. Hơnih jang mơdro kơ Kŏng ty iung jang hơdoi hăm Đoàn Hơdruh tơdăm tơlĕch jang kiơ̆ hloi tơdrong jang “Yak hơdoi hăm đe oh năm tơ̆ hnam trương” atŭm hăm pơtho tơdrong Tơdrong  jang Jơ Plei Tĕh 2023. Rim tơdrong pơgơ̆r jei lang să kơtang tơdrong tơpăt “Pơkom ŭnh hơyuh-Jing tơdrong joăt”.

Ƀok Nguyễn Quang Hùng,Kơ iĕng Kơdră Kŏng ty ŭnh hơyuh Kon Tum tơpăt, hơnih au hơpơi ‘mĕh vă lang să tơdrong jang “Pơkom ŭnh hơyuh-Jing tơdrong joăt” truh hăm kon pơlei hloh dơ̆ng, mă kăl ‘nŏh rim đe hŏk tro. Đơ̆ng noh, lang să nơ̆r au truh hăm ŭnh hnam, bôl boăl păng hloh dơ̆ng ‘nŏh pơđĭ lơ̆m tơpôl. ‘Moi kiơ̆ rim tơdrong pơgơ̆r pơrô̆ pơrôp, pơtho tơbăt, hlôi đei tơplih hơ iă lơ̆m jkơhngơ̆m đon jang kiơ̆ kơ kon pơlei găh iŏk yua pơkom ŭnh hơyuh vă vei lăng năng tông cham char, tang găn tơplih tŏ ‘mi kial:“Pơrô̆ pơrôp pơkom ŭnh hơyuh adoi nhen jang kiơ̆ Jơ Plei tĕh ‘nŏh trong bơ̆ jang hơnơ̆ng. Kŏng ty ŭnh hơyuh Kon Tum chă tơchĕng hơlen trong pơgơ̆r, rim tơdrong jang ƀônh pơm ăn kon pơlei hlôh vao, đei trong jang pha ƀlep kiơ̆ tơring. Rim ŭnh hnam doi nhen rim hơnih mơdro sa hrei au ‘nŏh akŏm lơ̆m bơ̆ jang pơkom ŭnh hơyuh vă bơ̆ jang iŏk đei jơnei kơ hơnih mơdro sa. Hăm rim ŭnh hnam tơdrong hlôh vao găh pơkom ŭnh hơyuh jei tŏk kơtang”.

‘Moi kiơ̆ tơdrong jang Jơ Plei tĕh 2023, dêh char Kon Tum pơkom đei 2.400 kWh ŭnh hơyuh. Tơdrong mă au tơƀôh hơdăh jơhngơ̆m pran lang să kơ rim tơdrong jang lơ̆m Tơdrong jang Jơ Plei tĕh 2023. Păng tơdrong kăl vă pơma truh ‘nŏh pơm kiơ̆ pơkom ŭnh hơyuh ư̆h khan lăp pơm kiơ̆ lơ̆m 1 jơ tơ̆ gơmăng năr tơdrau, giĕng hơtuch khei 3 rim sơnăm đei pơgơ̆r jang kiơ̆ Tơdrong jang Jơ Plei tĕh, mă lei hlôi jing tơdrong pơm kiơ̆ hơnơ̆ng rim năr hloi.