Ăh ‘năr tô̆ hlơ hlĕng kơ khei 3 Tây Nguyên, ‘nhŏng A Ngực, Ƀĭ thư Chi ƀô̆, kơdră thôn Đăk Rô Gia, xăh Đăk Trăm, apŭng Đăk Tô, dêh char Kon Tum duh oei hăt hot tŏk kông chă hơlen lăng tơdrong jang găk vei unh xa bri. ‘Nhŏng A Ngực ăn tơbăt, kon pơlei tơ̆ thôn iŏk vei lăng 240ha bri kơ Kŏng ti jang găh bri ‘long Đăk Tô. Đơ̆ng rŏng lơ khei ưh đei ‘mi atŭm hăm hơyuh ‘năr tô̆ hlơ hlĕng, đei minh hmok unh huăng noh bri ƀơm unh xa hloi, noh ưh gơh pơhơi ôh: “Chi ƀô̆ păng rim anih jang tơ̆ thôn jang atŭm hăm anih mir đak lar rim năr đei axong bơngai gak hơlen măng năr đei 2 ‘nu ăh minh anih hơlen. Chă dăr juang, hơlen bri noh 10 ‘nu, pơkăp noh ưh đei lê̆ đe năm tơ̆ bri iŏk đak xut dăh mă năm tơchă pơkao tơpông adoi kâ̆m hloi”. 

Xăh Đăk Trăm, apŭng Đăk Tô, dêh char Kon Tum dang ei đei jê̆ 2.000ha bri hon kơdih păng bri pơtăm kơ 3 tơ-‘ngla bri. Đơ̆ng lơ năr kơ âu, tôm hơgăt bri âu adoi  ƀônh ƀơm unh xa hli hlơt. Ƀok Trương Đình Tuệ, Kơdră Anih jang vei lăng kon pơlei xăh Đăk Trăm ăn tơbăt, tơdrong jang tang găn păng pĭt unh xa bri tŏk bŏk đei jơnŭm pơgơ̆r tơring tơrĕk kăp gĭt: “Lơ̆m khei năr tơm tô̆ pơđang nhen dang ei, Khŭl pơm jang vei lăng bri ‘long hơnơ̆ng pơtrruh bơngai jang hơlen tang găn păng pĭt unh xa. Jang atŭm hăm tơ-‘ngla bri păng axong khŭl jang vei lăng bri ‘long tơ̆ tơring, khŭl kŏng ang, bơngai jang tơ̆ xăh chă hơlen, pơgơ̆r rim unh hnam đei mir tơjê̆ bri adrol kơ muih choh noh athei tơroi ăn khŭl jang vei lăng bri vă dăh tom hơmet ming mưh đei tơdrong tơ̆ mir”.

Tơ̆ Gia Lai, kon pơlei, tơ-‘ngla bri, khŭl jang kơpal adoi oei adrin tang găn păng pĭt unh xa bri lơ̆m pơyan phang. Kon pơlei  thôn 1, xăh Hà Tam, apŭng Đăk Pơ iŏk vei lăng jê̆ 260 ha bri đơ̆ng Jơnŭm vei lăng bri hơmŏ Ƀăk An Khê. Vă kơchăng tang găn, xăh Hà Tam hlôi akŏm khul vei lăng, pơjing lơ anih hơlen vei lăng bri ‘long. Mă kăl, anih jang pơkăp xoh rơm rĕk kiơ̆ pơkăp lơ ha tơ̆ dôm tơring tơm ƀônh ƀơm unh xa. Ƀok Phạm Đông Mạnh, thôn 1, xăh Hà Tam, apŭng Đăk Pơ, unh hnam iŏk vei lăng bri ăn tơbăt: “Dôm khŭl đơ̆ng 2 truh 3 ‘nu chă hơlen măng năr, ăh đei tơdrong noh nhôn gô tơroi ăn jơnŭm vei hơlen bri ‘long Ƀăk An Khê băt păng nhôn gô hơvơn tôm kơsô̆ bơngai chă pơm jang kiơ̆ pơkăp 4 tơ̆ tơring đei khŭl jang tơ̆ tơring, pơgơ̆r tơ̆ tơring, tơmam drăm tơ̆ tơring, tơdrong tơgŭm tơ̆ tơring, nhôn jang atŭm kơjăp vă xek tơlang dôm tơdrong đei ƀôh”

Jơnŭm vei lăng bri hơmŏ Ƀăk An Khê (apŭng Đăk Pơ, dêh char Gia Lai) dang ei oei vei lăng hloh 10.000 ha bri, lơ̆m noh hơgăt bri hon kơdih đei 3.600 ha, bri pơtăm pơhlom 1.000 ha. Kơtă ăh blŭng xơnăm, anih jang hlôi hơmet akŏm Jơnŭm pơgơ̆r tang găn păng pĭt unh xa bri adoi nhen hơmet pơ-‘lơ̆ng 4 khŭl jang tơ̆ tơring ‘nao iŏk vei lăng, adoi jing khŭl jang tang găn păng pĭt unh xa bri hloi. Ƀok Lê Thái Hùng, Phŏ Kơdră Jơnŭm vei lăng bri hơmŏ Ƀăk An Khê, apŭng Đăk Pơ, dêh char Gia Lai ăn tơbăt, anih jang hơtŏk hơlen, pơtruh kang ƀô̆ hơlen vei atŭm hăm dôm khŭl iŏk vei lăng bri ‘long hơnơ̆ng chă hơlen tơ̆ rim anih tơm ƀônh ƀơm unh xa, xek tơlang tơtom dôm anih ƀơm unh xa, atŭm hăm noh akŏm khŭl jang tang găn păng pĭt unh xa truh kơ hrĕng ‘nu bơngai jang. Anih jang adoi tơlĕch dôm trong jang kih thuơ̆t nhen xoh rơm rĕk jih bri kiơ̆ pơkăp, chor trong pơgăn unh xa hăm dôm hơgăt bri ƀônh ƀơm unh xa: “Anih jang duh hơtŏk chă hơlen vei atŭm hăm dôm khŭl iŏk vei lăng bri, jang atŭm hăm jơnŭm pơgơ̆r tơring păng dôm anih jang tơpôl lơ̆m tơdrong tơroi tơbăt, jang atŭm ăh đei ƀôh unh xa noh adoi hơvơn khŭl jang tơtom. Atŭm hăm noh Anih jang vei lăng kon pơlei dêh char păng dôm anih jang dăh tơrĕk pơm trong hiôk ăn tơdrong pơkăp xoh rơm rĕk adrol nhen xoh kiơ̆ pơkăp vă tang găn ƀiơ̆ unh xa rok truh tơ̆ bri, tang găn ƀiơ̆ răm hăm tơdrong unh xa bri lơ̆m pơyan tơm tô̆ phang”

Oei apŭng Đăk Pơ, dêh char Gia Lai dang ei tŏk bŏk oei vei lăng jê̆ 24.000 ha bri, lơ̆m noh đei hloh 19.000 ha bri hon kơdih. Anih jang Vei hơlen Bri ‘long apŭng Đăk  Pơ hlôi chih akŏm tơdrong jang tang găn păng tơjră unh xa bri păng keh đang jơnŭm pơgơ̆r tang găn păng pĭt unh xa bri tơ̆ apŭng, xăh; hơtŏk tơroi tơbăt hơvơn kon pơlei hơlen dôm tơring bri mă po vei lăng, Anih jang vei lăng kon pơlei dôm xăh vă hơtŏk tơdrong jang tang găn unh xa bri gơh đei jơnei tơnăp.