Phang pơđang đunh năr au tŏk bŏk pơm ăn lơ bri tơ̆ dêh char Kon Tum hơmơt ŭnh sa tôch kơtang. Tơ̆ dêh char hlôi đei ŭnh sa bri pơm ăn 2 ‘nu bơngai lôch. Hrei au kon pơlei, tơngla bri, khul vei lăng bri tơ̆ Kon Tum tŏk bŏk kơrŭn đĭ jơhngơ̆m iung jang tang găn ŭnh sa bri.

Tơdrong kơtơ̆ng ang đơ̆ng Hơnih bơ̆ jang vei lăng bri dêh char Kon Tum tơbăt, hrei au hlôi dei 8 lơ̆m 10 apŭng, pơlei tơm kơ dêh char lơ̆m tơbăt kơchăng hơmơt ŭnh sa bri kơtang hloh. Tơ̆ rim apŭng găh pơmơ̆t kơ dêh char nhen: Ia H’Drai, Sa Thầy, Đăk Tô, Ngọc Hồi, đei vă jê̆ 230.000ha bri hơmơt ŭnh sa kơtang. Hơnih vei lăng bri dêh char Kon Tum tơbăt, atŭm hăm tang găn ŭnh sa bri lơ̆m tơring, Hơnih vei lăng kon pơlei dêh char jei hlôi pơjing keh đang rim tơdrong tơchơ̆t vă pơjing lei lăi lơ̆m bơ̆ jang tang găn hơlau ŭnh sa bri. Tơ̆ hơnăp tŏ ‘mi kial chrih chrĕng, phang pơđang rŏ năng oei pơdui đunh hơmơt ŭnh sa bri tôch kơtang, kon pơlei, tơngla bri, khul vei lăng bri păng kơdră tơring kơ dêh char Kon Tum tŏk bŏk kơrŭn đĭ jơhngơ̆m bơ̆ jang tang găn ŭnh sa bri.