Pơgê 20/4, tơ̆ plt Kon Tum, Anih chĕp kơ̆l đảng dêh char Kon Tum pơgơ̆r Hop akŏm pơtôch 10 sơnăm bơ̆ jang kiơ̆ tơdrong Tơchơ̆t Trung ương 8 jăl XI găh tơdrong vei lăng tĕh đak lơ̆m chăl ‘nao. Đại tướng Tô Lâm, Kơdră jang lơ̆m Anih tơm Chinh trĭ, Yŏng vei lăng khul linh Công an, truh akŏm păng iung pơma nơ̆r pơtho lơ̆m hop akŏm, chih răk, tơchĕng ‘lơ̆ng dôm tơdrong jang đei đơ̆ng Anih chĕp kơ̆l đảng dêh char Kon Tum iŏk đei đơ̆ng rŏng 10 sơnăm bơ̆ jang kiơ̆ tơdrong Tơchơ̆t Trung ương găh trong jang đunh đai vei lăng tĕh đak lơ̆m chăl ‘nao.

Pơma truh dôm tơdrong pơhnŏng vă jang, trong jang vei lăng tĕh đak đơ̆ng Anih chĕp kơ̆l đảng dêh char Kon Tum lơ̆m chăl ‘nao, Đại tướng Tô Lâm, akhan: athei akŏm jơhngâm chĕp kơ̆l pơgơ̆r pơm tơplih pran ‘lơ̆ng tơdrong pơgơ̆r jang kiơ̆ dôm trong jang, tơdrong tơgŭm đơ̆ng Đảng vă vei lăng tĕh đak, vei lăng kơjăp ‘lơ̆ng tơdrong sơđơ̆ng teh đak. Hơnơ̆ng hơmet kơjăp tơdrong guăt đĭ đăng hơdrĕch hơdrung, tơklep hăm tơdrong chĕp vei păng tưk tơiung jŏh ayŏ kơdŏ xoang pơjing đei trong jang ‘lơ̆ng hơiă vă vei kơjăp tĕh đak lơ̆m chăl ‘nao.