Lơ̆m dôm khei tơm kơ pơyan phang tơ̆ Tây Nguyên, mir na hăm hơgăt xă hloh 11ha kơ kon pơlei thôn Gia Xiêng, xăh Rờ Kơi, apŭng Sa Thầy, dêh char Kon Tum adoi oei jơk ƀlĭk hăm ƀa na pơyan Puih – Phang. 'Nhŏng A Thun, kơdră thôn Gia Xiêng ăn tơbăt, pơđĭ mir na pơchoh đơ̆ng dơnâu Đăk Hlang. vă tang găn pơđang noh athei mong ƀiơ̆ đak mă tơnăp: “Khei năr âu, mir na tơ̆ thôn Gia Xiêng, đak adoi oei đei măh. Kơdih inh ăh rim 'măng hopa kŏm thôn, adoi tơroi hăm kon pơlei băt iŏk yua đak mă trŏ ƀlep. Athei pơchoh đak truh tơ̆ na mă trŏ ƀlep kiơ̆ kơ jăl. Kơdih inh hơnơ̆ng năm hơlen lăng thong đak, dơnâu mong, hơvơn kon pơlei kôih hơmet hơbong thong đak vă đei măh đak lơ̆m pơyan jang Puih – Phang âu”

Atŭm hăm yua đak mong ƀiơ̆ păng tơnăp, vă tơjur ƀiơ̆ răm hăm hơgăt ƀa na pơyan Puih – Phang kơyuơ tô̆ phang ăh hơtuch pơyan pơm đei, tơ̆ dôm xăh nhen: Sa Nghĩa, Sa Bình, Ya ly… kơ apŭng  Sa Thầy, kơ hrĕng unh hnam hlôi tơplih pơtăm hơƀo, ƀum ƀlang, 'nhot âu to... tơplih kơ pơtăm ƀa ưh đei yua. Unh hnam đei 5 sao na, ƀok Phan Lương, oei tơ̆ thôn Hòa Bình, xăh Sa Nghĩa ăn tơbăt, hơmet tơdrong ưh kơ măh đak ruih ăn pơyan jang Puih – Phang, dôm xơnăm kơ âu ƀok tơplih 3 sao teh iŏk pơtăm hơƀo đei yua lơ hloh kơ jang ƀa: “Pơtăm hơƀo pơtêng hăm ƀa na noh rơvơn hloh, kơlih ƀa na noh rim năr inh athei năm hơlen lăng, mă kăl noh ăh pơyan Phuih – Phang vă pơchoh đak. Oei tơm hơƀo noh 10 năr inh pơtơm năm hơlen minh 'măng. Mă 2 noh vei lăng adoi hiôk mơ̆n, ưh đei ƀơm hơdrông sa lơ ôh. Pơtih nhen yă de, hơdrông pơrăm ưh đei lơ nhen ƀa. Hơƀo noh tĕch plei, plei ưh kơ 'lơ̆ng noh đe iŏk bơ̆ chả ram. Mă 3 noh tĕch tơ̆ tơm hloi, 1.000m2 noh tĕch đei jê̆ 1 trĭu hlj. Pơtăm hơƀo pơtêng hăm ƀa na noh pơyua hloh 2 'măng”.   

Apŭng Sa Thầy jing minh tơring ƀơm răm kơtang hloh ăh pơyan phang kơ dêh char Kon Tum, rim xơnăm hơnơ̆ng ăh jê̆ đĭ pơyan phang, tơdrong ưh kơ măh đak ruih ăn 'long pơtăm hơnơ̆ng kơ đei, mă kăl noh hăm ƀa na pơyan Puih – Phang. Đei xơnăm pơdui đunh năr, kon pơlei lơ̆m apŭng hiong đĭ đăng dôm jĭt ha ƀa. Ƀok Giả Tấn Đạt, Kơdră Anih jang găh Choh jang xa păng Hơtŏk tơring tơrang apŭng Sa Thầy ăn tơbăt, gơnơm pơm kiơ̆ lơ trong jang vă tơjră hăm tô̆ pơđang noh apŭng hlôi tơjur ƀiơ̆ răm lơ̆m tơdrong choh jang xa: “Hăm dôm hơgăt teh ưh đei tơjê̆ hăm dơnâu mong đak, noh pơkăp khei năr pơtăm hrôih hloh, mă kăl noh hăm dôm hơdrĕch 'long pơtăm tŏ xĕt năr. Minh ƀar tơring ưh đei dơnâu đak pơchoh truh noh tơplih pơtăm hơdrĕch 'nhot, hơƀo păng minh ƀar hơdrĕch 'long pơtăm nai. Atŭm hăm noh chă tơroi tơbăt, pơgơ̆r rim tơring, thĭ trâ̆n iŏk yua jên jang vă chă kôih hơmet hơbong thong đak,  tang găn dơnâu đak hư răm đak hrơ̆ âu to. Jang atŭm hăm Anih jang găh Pơnơ̆ đak choh jang, vă pơchoh đak mă trŏ ƀlep păng tơroi ăn kon pơlei yua mong ƀiơ̆ đak choh pơtăm”