Dôm măng ou ki, lơ pơlei pơla kơtă lơ̆m pơlei tơm Đà Nẵng ling lang ƀrach hơdăh. Tơ̆ phương Hòa Hải, quận Ngũ Hành Sơn, kơ mơjĭt ‘nu bơngai ‘noh đei kŏng nhân, ƀô̆ đô̆i, kang ƀô̆, đei hloi đe ƀok yă hlôi hloh 70 sơnăm vang chă tơra phe tơyông, tơ̆h hơtuh vă ‘nŭng ƀĕng tek, ƀĕng chư̆ng pơtruh ăn kon pơlei tơring ‘mi kial hơbŭt hơbông pơrăm tơ̆ tơring găh Tu. Mĭnh tŏ ƀĕng chư̆ng ‘nŭng ba hloi jơhngơ̆m đon ‘mêm kơ eng pơtruh ăn kon pơlei tơring găh Tu.

Tĭl pơgê ou, yă Trần Thị Thương, unh hnam mơdro sa tơ̆ kơchơ tơm Hòa Cường pơdơ̆h năm mơdro, năm răt 50 kĭ phe tơyông păng tơ̆h hơtuh vă atŭm hăm rim bơngai hơtŭk ƀĕng. Yă Thương tơbăt:“Kơtơ̆ng ang lơ̆m Brŏ, ba ƀrơ̆k mơnat, mălei ba ưh kơ đei nhen đe chă tơgum djru ăn lơ bơngai, kơna ba vang chă tơgop tŏ sĕt pơm ƀĕng hăm bôl boăl. Prăt măng hei ba ưh kơ sŭk kơ tep hloi, kơna pơgê ou ba tơgĕch kơdou năm tơ̆ ou vă chă pai  tơtom dôm ƀĕng pơtruh ăn lơ̆m năr hloi. Jĭ mĭnh hơdrĕch hơdrung kơna ‘mêm mơnat dêh”.

Dôm năr ou, hnam ƀok Nguyễn Thành Long, ŭnh hnam lơ̆m Khul gre bán tải Đà Nẵng oei tơ̆ phương Hòa Hải, kuân Ngũ Hành Sơn hlôi jing hơnih vă kon pơlei truh vang chă ‘nŭng, ƀai ƀĕng pơtruh ăn tơring găh Tu. Prăt măng prăt năr, tơ̆ kơlang hnam, ‘long ŭnh oei khơ̆ng bơ blông. Prăt măng kon pơlei lơ̆m koeng ƀôt tơplih dih băl krŏng pai ƀĕng. Ƀok Đặng Tâm, mă đơ̆ng đĭ 70 sơnăm oei tơ̆ kuân Ngũ Hành Sơn oei vang krŏng lăng gŏ pai ƀĕng tek vă tơtom pơgê hrôih pơtruh tơgŭm ăn kon pơlei tơ̆ tơring găh tu.“Mă đơ̆ng ba sơnăm đĭ kră mă lei hơdrin vang chă ‘nŭng ƀĕng chư̆ng hăm đe ‘nhŏng pơmai oh vă pơtruh tơgŭm ăn kon pơlei răm đơ̆ng ‘mi kial hơbŭt hơbông pơrăm tơ̆ rim dêh char găh Tu. Nhôn vang vei lăng đơ̆ng gơmăng hei khơ̆ dang ei, chă pơm truh 11 jơ, 12 jơ gơmăng mă brŏk, năr ou nhôn pai gŏ”.

Pơbŭng hnam tĕch đak chehphe kơ ƀok Nguyễn Thành Long jei hlôi jing hơnih vă kon pơlei năm ba pơtruh tơmam drăm tơgŭm ăn kon pơlei tơring răm đơ̆ng ‘mi kial hơbŭt hơbông pơrăm tơ̆ găh Tu. Ƀok Nguyễn Thành Long tơbăt, lơ sơnăm ou ki, rim ‘măng Đà Nẵng dăh mă kon pơlei tơring Tŏk bŏk tơƀơ̆p ‘mi kial hơbŭt hơbông pơrăm jei sơng iŏk đei tơdrong tơgŭm djru phăl hơlăng đơ̆ng kon pơlei lơ̆m teh đak. Dang ei kon pơlei rim dêh char găh Tu tơƀơ̆p tơnap tap, kon pơlei kơchăng năng tơgŭm hloi. Jĭ pôm “ƀok sơgơ̆r, yă sơgơ̆r” bu bu jei chhưu jơhngơ̆m păng hơpơi ‘meh vă đei tơgŭm djru tŏsĕt hăm kon pơlei tơring găh Tu lơ̆m jơ ‘năr ou:“Năr brei ‘nŭng đei 100.000 tŏ ƀĕng, năr ou ‘nŭng dơ̆ng 1.000 tŏ vă pơtruh ăn tơring găh Tu tơgŭm djru ăn kon pơlei. ‘Nhŏng oh vang iung jang lơ̆m lơ khul bu bu jei vang chă tơgŭm tŏ sĕt. Kon pơlei ‘nhŏng oh jei vang chă tơra kon jên vă răt bơ̆n phe ou to, lơ̆m năr dơning nhôn iung năm tơ̆ dêh char Yên Bái. Vang iung jang tơdrtong ou ba chă hơvơn đĭ đăng pơlei pơla păng koeng kơphô̆ păng pơmai oh tơ̆ phương Hòa Hải, kuân Ngũ Hành Sơn. Nhôn oei hơnơ̆ng chă ‘nŭng, pai ƀĕng chưng prăt măng. Bơngai bu đei yă kiơ hơnhăk ba yă ‘noh, pơtih gia nhen đak, mi tôm ƀĕng mi, tơmam drăm, nhôn chih jô̆ hơdăh păng chơ ba năm tơ̆ rim dêh char găh Tu. Nhôn oei hơnơ̆ng chă ‘nŭng ƀĕng chư̆ng truh pơgê dơning”.

Dôm năr ou, minh ƀar hơnih pơm ƀĕng tơ̆ pơlei tơm Đà Nẵng pơdơ̆h jang pơm ƀĕng anai vă akŏm pơm tơlĕch ƀĕng tơgŭm djru ăn kon pơlei tơring găh Tu. Khul kơdră chĕp pơgơ̆r rim dêh char, pơlei tơm tơring Tŏk bŏk hlôi chă pơrô̆ hơvơn kon pơlei vang chă tơra tơgop tơgŭm ăn kon pơlei tơring găh Tu hiong răm kơtang đơ̆ng ‘mi kial hơbŭt hơbông pơrăm. Rim khul năm iung jang hlôi năm jang hơdoi hăm khul jang tơgum dŏng păng hơmet pơ ‘lơ̆ng đơ̆ng kial hơbŭt pơrăm. Dôm hơyuh gre đơ̆ng tơring Tŏk bŏk tơgoăt dih băl trơ trôi năm tơ̆ tơring găh Tu hơnhăk ba tơmam drăm sa păng ƀĕnh ƀang jơhngơm đon ‘mêm kơ eng dih băl đơ̆ng kon pơlei tơring Tŏk bŏk ‘măn ăn kon pơlei răm ‘mi kial hơbŭt hơbông tơ̆ tơring găh Tu, tơgŭm ăn đe sư hrôih sơđơ̆ng hơrih sa.