Hơnih jang Ming man păng Hơnih jang Joh ayŏ, Tơplŏng kơdou păng Tơmang pơhiơ̆ jĭ 2 hơnih jang đei Anih jang vei lăng kon pơlei dêh char Lâm Đồng pơjao pơm kiơ̆ dôm tơdrong đei chih lơ̆m hô sơ Pơkăp atŭm Tơring tơmang pơhiơ̆ kơ teh đak tơ̆ Mũi Né truh sơnăm 2040, sơkơ̆t truh sơnăm 2050. Tơring tơmang đei pơkăp lơ̆m 3 xah, phương noh: Phú Thuỷ, Hoà Thắng păng Mũi Né hăm teh pơkăp să hloh 14.700ha. Pơkăp ming man, hơtŏk tơring tơmang pơhiơ̆ kơ teh đak tơ̆ Mũi Né jing minh hơnih tơm tơmang pơhiơ̆ kiơ̆ trŏ tơchơ̆t đơ̆ng apŭng plenh teh, anih truh tơmang tơm kơ tơring châu Á - Thái Bình Dương.

Kơchĕng truh sơnăm 2030 tơmoi truh tơmang gô đei pơhlom 14 triu 'nu, anih oei xa đei pơhlom 41.000 lăm păng teh ming man kơ dôm anih jang kăl pơhlom đei jê̆ 10.000ha. Ƀok Võ Thành Huy, Phŏ Kơdră Hơnih jang Joh ayŏ, Tơplŏng kơdou păng Tơmang pơhiơ̆ ăn tơbăt, adar jat noh truh năr 15/9 ou kơnh tôm hla bar pơkăp gô đei chih akŏm keh đang.