Tơ̆ jơ tơƀơ̆p, rim chăl kơdră tang măt Kuô̆k hô̆i Lâm Đồng, Đak Nông păng Bình Thuận tơroi tơbăt dôm tơdrong hơ iă, pơma tơbăt jơhngơ̆m đon lui kơjăp lơ̆m tơdrong hơgrop 3 dêh char pơih trong rơvơn ăn atŏk tơ iung ‘nao; hơpơi ‘meh vă rim kơdră tang măt hơnơ̆ng kiơ̆ yok yok jơ̆ng jơhngơ̆m đon hơgei, bơ̆ jang tơnăp, tơgop kơtang ăn Kuô̆k hô̆i. Iung pơma tơ̆ jơ bơ̆ jang, ƀok Y Thanh Hà Niê Kđăm, Bí thư Đảng dêh char, Kơdră Khul kơdră tang măt dêh char Lâm Đồng sơkơ̆t hơdăh, lơ̆m 80 sơnăm Kuô̆k hô̆i Việt Nam, rim chăl kơdră tang măt Lâm Đồng ling lang tơklep kơjăp hăm kon pơlei, tơƀôh tơbăt hơdăh dôm tơdrong tơpă ƀlep, tơdrong hơpơi ‘meh vă đơ̆ng bơngai tăh hla, tơgop lơ nơ̆r trŏ lăp lơ̆m tơ iuntg pơjing khôi luơ̆t, dăr lăng păng tơchơ̆t rim tơdrong kăl. Hrei ou Khul kơdră tang măt Kuô̆k hô̆i dêh char Lâm Đồng đei 19 ‘nu kơdră tang măt, đei 8 ‘nu kơdră tang măt Trung ương păng 11 ‘nu kơdră tang măt lơ̆m tơring.