Hloh 1 khei kơ âu, duch pơtho Cil Kồng, pơtho tơ̆ hnam trưng THPT Lang Biang, thĭ trâ̆n Lạc Dương, apŭng Lạc Dương, dêh char Lâm Đồng akŏm lơ jơ vă chă hơlen, keh đang tơdrong ‘nao vă pơtho ah jăl phôh thŏng. Duch ăn tơbăt, vă pơtrŏ ‘lơ̆ng hăm pơtho pơhrăm, rim bơngai pơtho athei năm hŏk lăm pơhrăm, hơmet ăn sơnăm hŏk ‘nao 2024-2025: “Sơnăm hŏk ‘nao âu, hnam trưng iŏk pơtho kiơ̆ pơhrăm phôh thŏng sơnăm 2018. Bơngai pơtho nhen nhôn athei hơmet tôm tơdrong pơkăl vă pơtho. ‘Nguaih kơ đang lăm pơhrăm gah săch yăo khua, tơdrong pơtho, hơlen sơkơ̆t kiơ̆ tơchơ̆t ‘nao, nhôn athei hơtŏk tơdrong pơtho, keh đang dôm ƀai pơtho, lơ̆m tơdrong hơmet ăn sơnăm hŏk ‘nao. Vei sơđơ̆ng ăn tơdrong pơtho pơhrăm kơ hnam trưng gơh tơnăp hloh”

Atŭm hăm tơdrong hơtŏk hơgei ăn bơngai pơtho, trưng THPT Lang Biang adoi chă hơmet ming hnam trưng, lăm hŏk păng răt tôm tơmam drăm kăl ăn pơtho pơhrăm pơtrŏ hăm tơdrong pơkăl pơtho phôh thŏng  2018. Kiơ̆ kơ ƀok Hoàng Viết Phương, Phŏ kơdră hnam trưng, sơnăm hŏk ‘nao trưng đei 14 lăm hăm hloh 600 hŏk tro, lơ̆m noh hŏk tro kon kông đei truh tong hơnê̆. Atŭm hăm vei sơđơ̆ng tơnăp tơchơ̆t pơtho pơhrăm, hnam trưng adoi hơmet anih oei nô̆i trŭ, vei tôm anih oei xa ăn đe hŏk tro kon kông: “Hnam trưng đei anih oei nô̆i trŭ kiơ̆ pơkăp kon pơlei kơdih rong ‘me, asong tôm anih oei xa ăn đe hŏk tro tơ̆ tơring hơtaih hơtŏ noh xah Lát păng Đưng K’Nớ, hăm pơhlom đơ̆ng 80 truh 100 hŏk tro. Atŭm hăm noh, hnam trưng adoi jang tơnăp tơdrong pơtho pơhrăm lơ̆mt ơpôl, adoi hơvơn chă răt tơmam drăm tơplŏng kơdâu, khăn buk, ‘măn ăn hŏk tro oei xa. Teh đak adoi tơgŭm ăn hnam trưng lơ tơdrong, tơgŭm ming man anih oei nô̆i trŭ ăn đe hŏk tro”.

Tơ̆ Đak Lăk, mơ̆t ah sơnăm hŏk ‘nao, lơ̆m tơdrong sô̆ hơ-iă đei truh tơ̆ trưng, đe hŏk tro tơring hơtaih yaih tơnap tap kơ dêh char sô̆ hơ̆k đei hŏk pơhrăm tơ̆ hnam trưng, lăm hŏk ‘nao đei man kơjăp ‘lơ̆ng. Ƀok Lê Ngọc Quyết, Kơdră hnam trưng Jăl kơđeh Kim Đồng, xah Cư Kbang, apŭng sơlam teh Ea Súp, dêh char Đak Lăk ăn tơbăt, Cư Kbang noh xah tơnap tap, 95% hŏk tro tơtă bơngai kon kông. Yơ̆ng âu ki, trưng đei apŭng Ea Súp asong jên man hnam 2 tăl hăm 10 lăm hŏk, đei pơga chơnĕng cham ƀê tŏng: “Hnam trưng tôch sô̆ hơ-iă đei lăm hŏk kơjăp mah hŏk pơgê kơsơ̆ lơ̆m minh năr. Hnam trưng hơdruh đĭ sơnăm 2024 gô đei jơnei nhen tơchơ̆t trưng dơnơm kơ teh đak kơsô̆ 1” 

Hăm apŭng hơtaih yaih Krông Bông, dêh char Đak Lăk, mă oei lơ tơnap tap, apŭng hlôi hơdrin hơvơn rim tơdrong kĕ đei vă hơmet hnam trưng, lăm hŏk, răt tôm tơmam drăm ‘măn hŏk pơhrăm ăn sơnăm hŏk ‘nao. Ƀok Y Thức Êban, Phŏ Kơdră Anih jang vei lăng kon pơlei apŭng Krông Bông tơroi: “Anih jang vei lăng kon pơlei apŭng hlôi pơgơ̆r anih jang pơtho pơhrăm jang hadoi hăm rim tơring, hăm rim hnam trưng chă hơlen tôm lăm hŏk, tơmam pơtho pơhrăm tơ̆ tôm hnam trưng lơ̆m apŭng. Mă yơ kăl hơmet hơdrol, asong tơdrong kĕ đei, mưh kĕ đei tôm noh roi ‘lơ̆ng, ưh kơ mah noh bơ̆n asong kiơ̆ tơdrong kăl hơdrol”.

Sơnăm hŏk 2024-2025, hăm hơnăn “Tơnăp sơnong jang, tơplih ‘nao hơnơ̆ng, hơtŏk hơgei”, dêh char Đak Lăk hơdrin tôm thôn, pơlei đei hnam trưng lăm hŏk mâu yăo; lăm hŏk kơjăp đei truh 93%, hnam trưng ƀlep nhen tơchơ̆t đơ̆ng teh đak truh kơ  60%.