Lơ̆m pơkăp dôm tơdrong jang kơ “Khei hơlen băt truh tơmang pơhiơ̆  Lâm Đồng sơnăm 2025”, lơ̆m 2 năr ou ki, Anih jang Joh ayŏ, Tơplŏng kơdou păng Tơmang pơhiơ̆ dêh char Lâm Đồng jang atŭm hăm Jơnŭm jang Tơmang pơhiơ̆ tơ̆ tơring akŏm khul Famtrip hơlen băt vă hơtŏk tơdrong tơroh dôm tơmam drăm, jang tơmang pơhiơ̆ tơ̆ 3 tơring Rơbou pơkao – Đak dơsĭ jơk – Bri kơdrơ̆ng. Đơ̆ng rŏng kơ tơmơ̆t hơdai 3 dêh char Lâm Đồng, Đăk Nông păng Bình Thuận, tơdrong jang tơmang pơhiơ̆ kơ dêh char Lâm Đồng pơtơm pơih đei minh cham char hơtŏk lang să, ƀenh kơ mŭk drăm, hơtŏk tơ-iung. Khul jang hơlen Famtrip đei dôm bơngai juăt jang, bơngai pơgơ̆r gah tơdrong jang tơmang pơhiơ̆, hnam trưng đăi hŏk, anih juăt jang gah tơmang pơhiơ̆... hlôi chă hơlen hơdah tơdrong đei ƀôh, hơlen tơmam drăm, tơdrong jang tơmang pơhiơ̆ tơ̆ 3 anih tơmang mă đe ư ang kơ dêh char Lâm Đồng, đei: Mũi Né – “găr dơmŏng kăp gĭt kơ tơmang đak dơsĭ Đông Nam Á”; Đà Lạt rơbou pơkao  -“Châu Âu tơ̆ tơring tŏ 'mi kial”; Tà Đùng – “Ving Hạ Long tơ̆ groi kông”.

Rim nơ̆r tơgop akhan Lâm Đồng athei tenh kuăng hơmet trong nơnăm vă pơtoi tơdrong tơmang pơhiơ̆ đak dơsĭ – bri - pơkao. Khei năr hơlen lăng tơring tơmang pơhiơ̆ dêh char Lâm Đồng sơnăm 2025 đei hơnăn: Lâm Đồng “Akŏm tơdrong hơgei – Akŏm jơhngơ̆m đon” pơgơ̆r đơ̆ng năr 6/9 truh năr 5/10 hăm lơ tơdrong joh ayŏ – tơmang pơhiơ̆ – tĕch pơdro – tơplŏng kơdou. 'Nou jĭ trong hiôk vă tơmang pơhiơ̆ dêh char Lâm Đồng pơlan să tơdrong tơroi kơ minh tơring teh 'lơ̆ng, băt 'mêm kơ tơmoi, ƀenh kơ um ai joh ayŏ kơdih păng akŏm ƀenh jơhngơ̆m đon.