Lêh sơng ƀok Tổng Bí thư, Kơdră teh đak Lào Thongloun Sisoulith atŭm hăm Hơkăn ƀok păng Khul kơpal kơ Đảng, Teh đak Lào đei pơgơ̆r kăp gĭt tơ̆ Anih jang đe Kơdră teh đak kiơ̆ khôi pơkăp kơpal hloh ‘măn ăn đe kơdră kơpal hăm 21 ‘măng pơnah ‘mrơ̆m sơng drơ̆ng. ‘Nâu jing ‘măng mă blŭng ƀok Tổng Bí thư, Kơdră teh đak Lào Thongloun Sisoulith năm tơmang truh teh đak bơ̆n, mă kăl ‘măng năm tơmang đei pơgơ̆r lơ̆m khei năr teh đak Lào jang Kơdră ASEAN 2024; ƀar teh đak tŏk bŏk oei pơm kiơ̆ Tơchơ̆t Hop akŏm Đảng Kon pơlei Lào ‘măng mă 11 păng Tơchơ̆t Hop akŏm Đảng Cộng sản Việt Nam ‘măng mă 13 ah hơtuch jăl jang.

Đơ̆ng rŏng kơ lêh sơng, adoi lơ̆m pơgê năr 10/9, ƀok Tổng Bí thư, Kơdră teh đak bơ̆n Tô Lâm hlôi akŏm pơma đam kơpal hăm ƀok Tổng Bí thư, Kơdră teh đak Lào Thongloun Sisoulith vă pơtoi hơtŏk jang hadoi tôm tơdrong kơ 2 teh đak roi năr roi đei jơnei, hơ-‘nhăk pơyua ăn kon pơlei, atŭm hăm noh tơgŭm dih băl lơ̆m tơdrong hop akŏm lơ̆m tơring păng lơ̆m apŭng plenh teh.