‘Nâu jĭ 1 lơ̆m dôm hnam trưng tơring hơtăih hơtŏ mơmat tat, đei pơgơ̆r lêh mơ̆t hŏk hrôih hloh kơ dêh char. Hloh 180 ‘nu hŏk tro kơ Hnam trưng hŏk jăl 1 Cư Pui 2, hnam trưng plei Ea Rớt, xăh Cư Pui, apŭng Krông Bông, dêh char Đắk Lắk hlôi năm pơm lêh mơ̆t hŏk hrôih sơnăm hŏk 2024 – 2025. ‘Nâu jĭ 1 lơ̆m dôm hnam trưng tôch kơ mơmat tat kơ dêh char Đắk Lắk, đei pơvang jum dăr yua đơ̆ng kông, mơmat tat găh trong nơnăm, kơsô̆ ŭnh hnam dơnuh hin đei hloh 90%.

Ƀok thây Nguyễn Hồng Thuần, Kơdră vei lăng Hnam trưng hŏk jăl 1 Cư Pui 2 tơbăt: Sơnăm hŏk 2024-2025, hnam trưng đei 7 lăm hŏk hăm 186 ‘nu hŏk tro. Ŭnh hnam đe oh hơtăih băl kơna đơ̆ng tŏk bŏk khei 8 hnam trưng hlôi jang hơdai hăm dôm hnam trưng tơring krao hơvơn, athei mĕ ƀă bơngơ̆t truh ba kon, oh truh tơ̆ hnam trưng. Hnam trưng kŭm hlôi hơmet ăn tôm vă đe oh đei 1 sơnăm hŏk ‘nao ƀĕnh tơdrong chhôk ‘nă păng iŏk đei jơnei ‘lơ̆ng.