Tơ̆ jơ pơm lêh, dôm bơngai tang măt vang pơđou dơ̆ng tơdrong ang hơdăh đơ̆ng tơdrong iung jang tơ jră năm pơm trong, tơ jră plơ̆ trong chĕp kơ̆l pơgơ̆r pơgŏ pơđep đơ̆ng ayăt yua đe lĭnh Cộng sản tơ̆ hnam pơnă Kon Tum pơgơ̆r đơ̆ng ‘năr 12-16/12/1931. Hăm dôm bơngai pơnă Cộng sản, khŭl lĭnh ayăt Phalăng hlôi prăh phao pơm ăn 15 ‘nu lôch păng 16 ‘nu rơka.

Lêh sơng iŏk hơnăn Khŭl lĭnh kon pơlei nuih pơjao asong ăn kơ Đĭ đăng lĭnh kach mang đei ayăt rôp kron tơ̆ Hnam pơnă Kon Tum ‘noh jĭ ‘măng pơdou dơ̆ng tơdrong joăt joe iung tơblăh nuih mơng, kơtang, pơtho pơhrăm tơdrong joăt ‘mêm kơ teh đak, jơhngơ̆m băt bơnê gĭt kăl hăm rim jơhnơr ƀok yă hlôi hŭt hơkâu yua kơ tơdrong rơngei, hiôk hian. Kiơ̆ đơ̆ng noh, tơiung jơhngơ̆m ‘nă hal hơdrĕch hơdrŭng, đon hơdrin kơdih, jơhngơ̆m đon tơgoăt tơgoăl, pơm tơdrong hơiă pơjei băl ‘lơ̆ng vă jang kiơ̆ jơnei dôm tơdrong hơgăt mŭk drăm tơpôl tơ̆ tơring.