Pơgê hei (5/9), tơ̆ Hnam hôp teh đak (Hà Nội), Anih tơm vei lăng pơtho pơhrăm pơm lêh tơbăt 80 sơnăm năr juăt jue kơ anih pơtho pơhrăm păng năr lêh mât hŏk sơnăm hŏk ‘nao 2025 - 2026. ‘Nâu jĭ ‘măng mă blŭng, vă jê̆ 30 triu ‘nu hŏk tro, sinh viên kŭm hăm 1,7 triu ‘nu thây kô lơ̆m teh đak vang pơm lêh mât hŏk sơnăm hŏk ‘nao hơdai, đei pơih trư̆k tuyê̆n, vang chao kơ păng hơri ƀai Quốc ca.

Vang truh akŏm đei Tổng Bí thư Tô Lâm, Kơdră  teh đak Lương Cường, Thủ tướng Phạm Minh Chính, Kơdră Quốc hội Trần Thanh Mẫn kŭm hăm lơ kơdră chĕp kơ̆l dang ei păng adrol sơ̆ kơ Đảng, Teh đak; bơngai dơ̆ng tang ăn dôm anih tơm, anih jang kơpal păng dôm anih jang, khul grŭp lơ̆m apŭng plenh teh tơ̆ Việt Nam. Sơnăm hŏk 2025 - 2026 đei năng jĭ sơnăm hŏk mă blŭng tơlĕch jang dôm tơdrong tơchơ̆t gĭt kăl đơ̆ng Đảng păng Quốc hội, lơ̆m noh đei tơdrong tơchơ̆t găh pơtho pơhrăm mầm non ăn hơioh đơ̆ng 3-5 sơnăm, Luơ̆t Bơngai pơtho păng tơdrong tơgŭm ưh đei nôp jên hŏk.

Anih pơtho pơhrăm chih hơdăh hơnăn sơnăm hŏk 2025-2026 ‘nŏh “Tơpăt ‘lơ̆ng – Gơh hơgei – Tơplih pran – Jang tŏk” hăm 10 tơdrong jang, trong vă jang tơm vă bơ̆ jang đei jơnei dôm trong jang, tơdrong tơgŭm đơ̆ng Đảng păng teh đak găh pơtho pơhrăm, bơ̆ jang đang ‘lơ̆ng rim tơdrong đei tơlĕch. Lêh tơbăt 80 sơnăm kơ anih pơtho pơhrăm păng năr pơm lêh mât hŏk sơnăm hŏk 2025 – 2026 ưh lăp vă tơƀlŏk dơ̆ng dôm tơdrong juăt ‘lơ̆ng, chih răk dôm tơdrong tơgop tih tên đơ̆ng anih pơtho pơhrăm hăm tơdrong jang kăch mang đơ̆ng Đảng păng teh đak bơ̆n đĕch mă oei jing jơnăr tưk tơiung đon tơnăp đơ̆ng anih pơtho pơhrăm pơma hơdrô̆ păng đĭ đăng tơpôl pơma atŭm tơ̆ hơnăp nơ̆r athei jang tŏk đơ̆ng teh đak lơ̆m chăl ‘nao.