Pơre nơ̆r lơ̆m jơ pơm lêh, Tổng Bí thư Tô Lâm pơma hơdăh, yak hlŏh 80 sơnăm ƀĕnh tơdrong pơmat tat mă lei kơtang nuih mơng, bơ̆n tơƀôh hơdăh tơdrong trŏ: Hơla hla kơ gơ̆h hơgei đơ̆ng Đảng, đei Ƀok Hô tơƀôh trong, gơnang đơ̆ng jơhngâm pran kon pơlei păng tơdrong mât 1 ƀơ̆r đon tơguăt băl kơ đĭ đăng hơdrĕch hơdrung, ưh đei tơdrong pơmat tat, long nol yơ mă kon pơlei bơ̆n ưh kĕ yak hlŏh; ưh đei tơdrong ‘lơ̆ng kiơ mă kon pơlei bơ̆n ưh gơ̆h jang đei. 

Đơ̆ng rŏng kơ ƀai pơre đơ̆ng ƀok Tổng Bí thư Tô Lâm, jơ lêh đei pơgơ̆r dơ̆ng hăm tơdrong yak pơrŏ khul linh tơbăt 80 sơnăm Kăch mang khei 8 iŏk jơnei (19/8) păng Quốc khánh teh đak Cộng hòa Xã hội Chủ nghĩa Việt Nam 2/9 hăm tơdrong vang akŏm đơ̆ng dang 30.000 ‘nu bơngai, lơ̆m noh đei lơ khul linh, kon pơlei bơ̆n păng khul linh yak pơrŏ truh đơ̆ng dôm teh đak Trung Quốc, Nga, Lào, Campuchia vang akŏm.

Lêh tơbăt 1 ‘măng dơ̆ng tơƀôh hơdăh jơhngâm đon kăch mang khei 8 păng Quốc khánh teh đak Cộng hòa xã hội chủ nghĩa Việt Nam ưh kĕ tôch; tơƀôh jơhngâm đon ling lang hưch hanh, jĭ jơhngâm pran pơm ăn đĭ đăng hơdrĕch hơdrung Việt Nam hơnơ̆ng pran kơtang, khŏm chĕp kơ̆l pơgơ̆r kơdih, rơngei hiôk hian ‘moi kiơ̆ đơ̆ng yă ƀok sơ̆, tưk tơiung đon kơtang, gơ̆h hơgei, tơplih ‘nao, khŏm pơjing 1 teh đak Việt Nam tŏk pran ‘lơ̆ng lơ̆m rim tơdrong, pran kơjăp iăp kơtang lơ̆m chăl ‘nao – chăl jang tŏk đơ̆ng hơdrĕch hơdrung Việt Nam.