Gơmăng năr 29/8, Hơnih Đảng pơlei tơm, Jơnŭm vei lăng kon pơlei, Hơnih vei lăng kon pơlei, Hơnih MTTQ Việt Nam pơlei tơm HCM pơgơ̆r et sa hăm Kơdră tang măt teh đak đe tơ̆ pơlei tơm, kơkuh chơt hơ iă tơbăt 79 sơnăm Kuô̆k khanh teh đak Cộng hòa xã hội chủ nghĩa Việt Nam tơ̆ Hơnih bơ̆ jang kơ Hơnih vei lăng kon pơlei kơ pơlei tơm. Kơdră chĕp pơgơ̆r Hơnih vei lăng kon pơlei kơ pơlei tơm Hồ Chí Minh Phan Văn Mãi pơma tơbăt jơhngơ̆m đon hôn bơnê dôm tơdrong jang tơbôl ‘lơ̆ng hơ iă mă bôl boăl teh đak đe hlôi iung jang hơdoi hăm Pơlei tơm vă tơlĕch jang kiơ̆ lơ̆m prăt khei năr ou ki. Đơ̆ng blŭng sơnăm ou truh dang ei, pơlei tơm hlôi sơng đei hloh 30 khul kơdră kơpal teh đak đe, pơđĭ rim kơdră chĕp pơgơ̆r lơ teh đak păng vă jê̆ 100 ‘măng tơƀơ̆p pơma dơnuh hăm lơ tơdrong kăl, akŏm lơ̆m jang hơdoi atŏk tơ iung mŭk drăm kơjăp ‘lơ̆ng. Tơdrong mă ou tơƀôh hơdăh hơnăp jang păng hơnih dơ̆ng kơ pơlei tơm hăm bôl boăl teh đak đe.

Ƀlep ƀơ̆t tơbăt 79 sơnăm Quốc khánh teh đak Cộng hòa Xã hội Chủ nghĩa Việt Nam, pơgê 30/8, kơdră chĕp kơ̆l Anih jang Đảng dêh char, Jơnŭm pơgơ̆r kon pơlei, Anih vei lăng kon pơlei, Anih jang Mặt trận Tổ quốc Việt Nam dêh char Đắk Lắk kŭm hăm dôm khŭl lĭnh păng kon pơlei hlôi năm dan kơvang pơkoa, soh plang nhang hơpong tơ̆ pơsat lĭnh lôch tang ăn teh đak dêh char, hơnih ƀŭ kơ 2.326 lĭnh lôch tang ăn teh đak. Lơ̆m jơ năr gĭt kăl, dôm bơngai tang măt hlôi dan kơvang pơkao, soh plang nhang, kŭp kơ̆l ƀlŏk hơdơ̆r, tơƀôh jơhngơ̆m đon băt bơnê gĭt kăl hăm tơdrong jang tih tên đơ̆ng đe Lĭnh nuih mơng lôch tang ăn teh đak hlôi nuih mơng iung tơblăh, hŭt hơkâu yua kơ tơdrong jang iung tơblăh rơngei hơdrĕch hơdrŭng, rơngei teh đak. Đơ̆ng rŏng lêh soh plang nhang, pơyơ̆r pơkao, kơdră chĕp kơ̆l dêh char Đắk Lắk kŭm hăm rim khŭl lĭnh păng lơ lap kon pơlei hlôi soh nhang tơ̆ dôm pơsat Lĭnh lôch tang ăn teh đak.