Lơ̆m noh tơgop nơ̆r găh dôm tơdrong vă jang ăn 'măng hop akŏm mă 5, Kuôk hô̆i jăl 15 păng hơlen, tơgop nơ̆r lơ̆m minh ƀar tơdrong kăp gĭt tơrĕk truh tơdrong jang kon kông. Năm hop akŏm đei bơngai jang lơ̆m Anih tơm Chĭnh trĭ, Phŏ kơdră Anih juăt jang kơ Kuôk hô̆i Trần Thanh Mẫn. Pơma pơgơ̆r hop akŏm, Phŏ Kơdră Anih juăt jang Kuôk hô̆i Trần Thanh Mẫn ră hơdăh, Đảng păng Jơnŭm pơgơ̆r teh đak hơnơ̆ng tơrĕk truh, tơlĕch păng pơm kiơ̆ lơ tơdrong pơkăp jang găh kon kông, tơgop pơjing tơdrong xơđơ̆ng, hơtŏk tơ-iung, hơtŏk rim tơdrong erih mŭk drăm păng đon bơnôh ăn kon pơlei kon kông. Tơbang hơdăh kiơ̆ Tơdrong jang đơ̆ng Jơnŭm pơgơ̆r teh đak păng tơlĕch hơlen ăh tong anê̆ 'măng hop akŏm kơ Kuôk hô̆i tơdrong pơm kiơ̆ Tơchơ̆t kơsô̆ 88 păng Tơchơ̆t kơsô̆ 120 Kĭ pơkăp Tơdrong Pơkăp jang tôm păng Pơkăp axong jang kiơ̆ tơchơ̆t kơ teh đak găh hơtŏk mŭk drăm, tơpôl tơring kon kông păng groi kông jăl xơnăm 2021-2030.