Tơ̆ ‘Măng tơƀơ̆p, ƀar ‘nu Tổng Bí thư, Kơdră chĕp pơgơ̆r Teh đak sơkơ̆t hơdăh tơdrong tơgoăt tơgoăl Việt Nam-Lào jĭ mŭk drăm gĭt kăl kơ ƀar hơdrĕch hơdrung, jĭ tơdrong kăl hloh păng jơhngơ̆m pran tih tên kơ ƀar Đảng, ƀar Teh đak păng kon pơlei ƀar teh đak, kăl hơnơ̆ng kiơ̆ yok rok jơ̆ng, vei kơjăp păng pơtoi ăn rim jơhnơr đơ̆ng rŏng. Tổng Bí thư, Kơdră chĕp pơgơ̆r Teh đak Tô Lâm sơkơ̆t hơdăh, tơ̆ rŏng hơnăp jĭ mĭnh, tơgoăt tơgoăl Việt Nam - Lào ling lang jing tơlĕch iung jang blŭng hloh lơ̆m trong jang tơbôl đơ̆ng Việt Nam. Tổng Bí thư, Kơdră chĕp pơgơ̆r teh đak Lào Thoong-lun Xỉ-xu-lít sơkơ̆t hơdăh, mă đơ̆ng jơ ‘năr ayơ, Lào gô atŭm hăm Việt Nam hơmet pơ ‘lơ̆ng, vei kơjăp păng pơlăp ‘lơ̆ng hloh dơ̆ng tơgoăt tơgoăl pôm nơ̆r ƀơ̆r đon kơjăp Việt Nam - Lào roi năr roi atŏk tơ iung, ‘lơ̆ng hơ iă, kơ yuơ đei iŏk yua ăn kon pơlei ƀar teh đak, kơ yuơ rơngei hiôk hian, sơđơ̆ng păng atŏk tơ iung kơ tơring păng apŭng plĕnh teh.