Tơ̆ tơring sơlam xăh Đăk Nhoong, apŭng Đăk Glei, dêh char Kon Tum, ƀok A Cu, bơngai Jeh-triêng, Bí thư chi ƀô̆ pơm hloi ƀok Pơgơ̆r plei Đăk Ga, tơroi, kon pơlei hơnơ̆ng chă tơgŭm băl jang tŏk mŭk drăm păng adrin kŭm hăm dôm khul linh vei lăng kơjăp tơring sơlam. Tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô tôch đei yoa hăm đe đảng viên tơ̆ âu: “Rim năr ba hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô ‘nŏh jĭ hŏk jang kiơ̆ dôm tơdrong hơiă, tơdrong ‘lơ̆ng. Hŏk kiơ̆ Ƀok ‘mơ ‘met, ưh đei pơhuach kư̆ kă lơ̆m năr. Đang kơ ‘nŏh hŏk iŏk tơdrong pơma xa, pơlung, krao hơvơn kon pơlei jang xa. Atŏk tơiung mŭk drăm lơ̆m unh hnam vă gơ̆h tŏk klăih đơ̆ng tơnuh hin kơjăp ‘lơ̆ng”.

Đảng viên năm hơdrol, jang mă tơnăp ‘lơ̆ng vă kon pơlei jang kiơ̆, ‘nŏh jĭ tơdrong mă ƀok A Thiếu, bơngai Jarai, tơ̆ plei Lung, xăh Ya Xiêr, apŭng Sa Thầy, dêh char Kon Tum, bơ̆ jang mưh hơmet ming pơgar ‘long, atŏk tơiung mŭk drăm lơ̆m unh hnam: “Tơdăh bơ̆n pơtăm ‘long mă hŭt hơchăng lê̆ ‘nŏh ‘long ưh gơ̆h blŭh vơ̆ ôh, đe nŏng akhan yoa teh đak asong hơdrĕch ‘long ưh ‘lơ̆ng, thoi noh ưh kơ trŏ ôh, yoa tơdrong ‘nâu kơlih đơ̆ng bơ̆n ưh đei vei lăng ‘lơ̆ng. Tơdăh ba vei rong ‘lơ̆ng ‘nŏh ‘long gô blŭh jing ‘lơ̆ng ‘năi. Unh hnam yơ sir sơlŭng pơtăm ‘long, răt kơmăy ƀôm đak păng sir khoan đak kuay, chô̆ kơmăy ƀôm vă tơruih lei sư ‘lơ̆ng. Unh hnam nhôn adrin pơtăm ‘long chăt arih jing ‘lơ̆ng vă gơ̆h hơnhăk ba tơdrong đei yoa găh muk drăm, tơgŭm ăn bơ̆n gơ̆h tŏk klăih đơ̆ng tơnuh hin kơjăp ‘lơ̆ng”.

3 sơnăm âu ki, lơ̆m tơring kon kông oei tơ̆ dêh char Kon Tum pơjing đei hlŏh 800 trong tơgŭm băl jang tŏk mŭk drăm, pơtăm hơmet ming pơgar ‘long, sut pơđĭ tơdrong juăt ưh kơ ‘lơ̆ng… Dôm trong jang âu hlôi tơgŭm ăn hlŏh 10.000 unh hnam tơnuh păng vă jê̆ tơnuh đei tơdrong ‘lơ̆ng vă jang tŏk. Jĭ 1 lơ̆m dôm ‘nu bơngai jang rơgei, đei pôk pơ ư tơ̆ Hop akŏm vă hơtŏk tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô yoa Anih chĕp kơ̆l Đảng dêh char Kon Tum pơgơ̆r lơ̆m khei 5 âu ki, ƀok A Huế, bơngai Xơ-Đăng, Ƀok pơgơ̆r plei Kon Nhên, xăh Đăk Ruồng, apŭng Kon Rẫy, ăn tơbăt: “Hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô, nhôn krao hơvơn kon pơlei adrin pơjing đei tơring tơrang ‘nao. Inh jur krao hơvơn kon pơlei tơgŭm băl năr jang, hơmet pơ ‘lơ̆ng cham rông, vang hơmet ming trong. Pơtăm ‘long tơter trong tih kŭm nhen dôm jăl trong tơ̆ tơring tơrang. Năng tơ̆ yăn âu ‘nŏh gơ̆h ƀôh hrei ‘nâu kon pơlei ưh pă đei kơ tul, kơ hlôh nhen sơ̆ bơih”.

Kŭm nhen tơ̆ dêh char Kon Tum mơ̆n, kon pơlei dôm hơdrĕch hơdrung tơ̆ dêh char Lâm Đồng oei tơplih ming ‘long pơtăm, jang kiơ̆ khoa hŏk ki thuơ̆t vă jang xa roi đunh roi tŏk pran. Ƀok Kon Sơ Ha Vương, bơngai K’Ho, Kơdră Anih MTTQ xăh Đạ Nhim, apŭng Lạc Dương, ăn tơbăt, tơplih ăn tơdrong lăp pơtăm hơdrô̆ ‘long chĕh phe, kon pơlei hlôi pơtăm lơ kơloăi ‘long, dar deh choh jang xa, pơm tơlĕch tơmam kiơ̆ hla ar pơkăp, păng vang akŏm 1 jơhngâm bơ̆ jang pơjing tơring tơrang ‘nao pơdrŏng đei ƀôh: “Hăm trong jang teh đak păng kon pơlei vang bơ̆ jang, lơ trong gre, gơng, hơbong đak hlôi đei man hơmet kơjăp ‘lơ̆ng. Kŭm hăm mŭk drăm sơđơ̆ng ‘lơ̆ng, tơdrong arih xa găh jơhngâm đon păng tơmam drăm đơ̆ng kon pơlei kŭm roi tŏk ‘lơ̆ng ‘năi”.

Kŭm pơtăm lơ kơloăi ‘long vă jang kiơ̆ trong pơm tơlĕch tơmam drăm, bơngai Rađe tơ̆ dêh char Đắk Lắk oei adrin jang pơm pơdrŏng. Ƀok Y Mi Êban, tơ̆ plei Ea K’mat, xăh Hoà Đông, apŭng Krông Pach tơroi găh tơdrong pơtăm hơlam ‘long sầu riêng, tiu lơ̆m pơgar chĕh phe xă 1,4 ha: “Hăm hơnăp jang jĭ đảng viên bơ̆n athei năm hơdrol păng jang mă tơnăp vă kon pơlei jang kiơ̆, hơnơ̆ng adrin hŏk pơhrăm atŏk tơiung mŭk drăm unh hnam. Mưh pơtăm hơlam ‘long sầu riêng, kŭm ưh đei jên vă jang ‘năi kơna inh athei năm tŏk iŏk jên tơ̆ ngân hang păng hŏk iŏk ki thuơ̆t pơtăm. Sơnăm ‘nâu phĕ đei dang 15 tấn plei sầu riêng, kŭm hăm chĕh phe păng tiu ‘nŏh đei iŏk yoa kŭm sơđơ̆ng mơ̆n.”

Tơ̆ dêh char Gia Lai, kon pơlei dôm hơdrĕch hơdrung oei adrin hŏk iŏk dôm trong jang xa ‘nao vă tơdrong arih xa roi đunh roi tŏk ‘lơ̆ng. Ƀok Hmrick, kră pơlei, bơngai Jarai, tơ̆ plei Ia Nueng, xăh Biển Hồ, plt Pleiku, ăn tơbăt, hăm tơdrong tơmât jên jang đơ̆ng teh đak, kon pơlei oei tưk tơiung ming dơ̆ng dôm tơdrong jang xo, chrăih mul, tanh hơkăt, tanh brai vai khăn; hŏk iŏk trong pai tơmam rơgŏh ‘lơ̆ng păng pơgơ̆r bơ̆ jang chă tơmang lăng lơ̆m tơpôl:

“Hrei ‘nâu tơdrong arih xa kơ kon pơlei đei tơplih roi ‘lơ̆ng, lơ̆m pơlei trong yak tôch hiôk, ưh pă đei bu pơngot, tơnuh bơih. Hăm hơnăp jang jĭ kră pơlei, inh hơnơ̆ng pơtho tơƀôh ăn kon pơlei hlôh vao hơdăh trong jang, tơdrong tơgŭm đơ̆ng Đảng, teh đak, kon pơlei hơđơ̆ng jơhngâm lui kiơ̆ trong jang đơ̆ng Đảng, teh đak. Pơjing pơlei chă tơmang lăng lơ̆m tơpôl ‘nŏh jĭ trong jang tôch trŏ vă pơm tơplih tơdrong arih xa kơ kon pơlei, vă gơ̆h phĭ tơtŏ dơnŏ ‘lơ̆ng, hiôk chơt ƀiơ̆.”.

Kŭm hăm kon pơlei dôm hơdrĕch hơdrung tơ̆ Tây Nguyên, bơngai Mnông tơ̆ dêh char Đắk Nông oei akŏm jơhngâm pơjei băl jang xa păng pơjing tơring tơrang ‘nao. Ƀok K’Sung, Ƀok pơgơ̆r plei Ting Wel Đơm, xăh Đắk Nia, plt Gia Nghĩa, chơt hơiă pơma: gơnơm đei Đảng, đei Ƀok Hô, kon pơlei gơ̆h đei tơdrong arih xa phĭ tơtŏ dơnŏ ‘lơ̆ng: “Lơ̆m dôm tơdrong iung tơblăh ayăt, hăm kon pơlei kon kông tơ̆ âu hơnơ̆ng lui kiơ̆ Đảng. Klep truh dang ei, kon pơlei oei hơnơ̆ng lui kiơ̆ trong jang đơ̆ng Đảng, khôi luơ̆t teh đak, mât 1 jơhngâm vă vei kơjăp tơdrong rơngei hrei ‘nâu păng ling lang tơgŭm băl vă pơjing mŭk drăm roi đunh roi tŏk, tơdrong arih xa roi hiôk jơnap, adrin jang vă kon pơlei pơdrŏng, teh đak pran kơjăp.”

Ƀok Hô lôch hơchăng đĭ hlŏh 55 sơnăm bơih, mă lei jơhngâm đon ‘mêm kơeng đơ̆ng Ƀok oei ling lang oei hơdai hăm kon pơlei Việt Nam. Đĭ đăng Đảng, đĭ đăng kon pơlei bơ̆n khŏm “mât mĭnh ƀơ̆r đon, pôm jơhngâm, vang pơjing 1 teh đak Việt Nam rơngei hiôk hian, kơjăp ‘lơ̆ng, chĕp kơ̆l pơgơ̆r kơdih păng pơdrŏng pran kơtang” nhen thoi tơdrong hơpơi ‘mĕh mă hơtuch đơ̆ng Ƀok Hô ‘mêm kơeng./.