Mă hơdăh, tơ̆ xăh Ia Hiao, ‘mi tih đunh hlôi pơm ăn 120 ŭnh hnam kon pơlei đei đak lơ̆p truh tơ̆ hnam; 109 hek tar ƀa pơyan, 86 hek tar hơƀo, tơh păng păng 43 hek tar ƀum ƀlang đei păk tơgơ̆, đak lơ̆p, jô̆ pơhlom hiong răm hloh 2,4 ti hlak jên. Hơdai hăm tơdrong pơm kiơ̆ dôm trong jang hăt hot vei sơđơ̆ng ăn kon pơlei, khŭl kơdră chĕp kơ̆l tơring tŏk bŏk dăr hơlen, athei dêh char jăh kĭ ăn tơdrong jang ăn oei tơ̆ plei hle ăn kơ dôm ŭnh hnam hơnơ̆ng đei đak lơ̆p rim sơnăm, hơdai hăm apĭng tơgŭm jên hơmet pơ ‘lơ̆ng jang sa, sơđơ̆ng tơdrong hơrih sa ăn kon pơlei.

Tơ̆ xah Ea Bung, dêh char Đăk Lăk minh ƀar unh hnam kon pơlei tơ̆ thôn 4 păng thôn 12 ƀơm đak lơ̆p, jăl trong vih vơ̆t tơ̆ xah Ea Bung – Ia Rvê ƀơm tơklah hloi. Tơ̆ xah Ia Lốp, thôn 10 găn thôn 11 adoi ƀơm đak lơ̆p, lơ jăl trong tơ̆ dôm thôn 6,8,9 đak lơ̆p jrŭ, trong nơnăm tơhlăk tăk lơ̆m minh ƀar jơ.

Tơ̆ xah Tây Sơn, 'mi tih pơm teh hơlih tơ̆ jăl trong tơm kơ dêh char DT646 păng minh ƀar jăl trong vih vơ̆t đơ̆ng pơlei truh tơ̆ mir na. Atŭm hăm noh, đei 29 tŏ rơmo ƀơm đak tơhiu; chơnĕng hnam trưng Rong vei hơ-ioh Phước Tân hơlih kơjung truh pơhlom 40m. Dang ei, jơnŭm pơgơ̆r tơring hlôi hơvơn khul jang vă chă ming hơmet, tơgŭm kon pơlei păng vei sơđơ̆ng trong nơnăm.

‘Mi tih pơm ăn đak lơ̆p hloh 300 tŏ hnam kon pơlei tơ̆ 4 pơlei kơ xăh Hiệp Thạnh, dêh char Lâm Đồng. Vă tơgŭm kon pơlei tơtĕnh sơđơ̆ng dơ̆ng tơdrong hơrih sa, khŭl kơdră chĕp kơ̆l tơring hơnơ̆ng hơvơn kang ƀô̆, khŭl lĭnh kŏng an, ƀô̆ đô̆i tơgŭm kon pơlei chơ pơdŭ mŭk tơmam đơ̆ng hơnih yông tơklăh vih dơ̆ng tơ̆ hnam.

Tơ̆ xăh tơ ter đak dơsĭ Hoà Thắng, ‘mi tih pơm ăn teh chuơh blai lơ̆m 1,2 tŏ hnam kon pơlei. Kơđô̆ng lĭnh vei lăng tơring sơlam Hòa Thắng hơvơn kang ƀô̆, khŭl lĭnh tơgŭm kon pơlei hơpuih hơmet hnam oei, sơđơ̆ng tơdrong hơrih sa.