Truh dang ei, dôm jĭt 'nu bơngai pơtho Hnam trưng THPT Pleime, tơ̆ xăh Ia Ga, apŭng Chư Prông dêh char Gia Lai, duh tam mă đei kla jên tơgŭm hloh 800 triu hlak jên,  jing pơkăp 'măn ăn bơngai pơtho tơ̆ tơring tơnap tap. Ƀok Nguyễn Thế Hùng – Kơdră Hnam trưng THPT Pleime, xăh Ia Ga, apŭng Chư Prông ăn tơbăt, 27 kang ƀô̆, bơngai pơtho kơ anih jang ƀơm đe hre jên tơgŭm lơ̆m 6 khei, đơ̆ng khei 7 truh khei 12/2021, hăm kơsô̆ jên noh 837 triu hlak jên.

Hnam trưng THPT Pleime, xăh Ia Ga, apŭng Chư Prông, Gia Lai. (Rup: Nguyễn Thảo)

Đơ̆ng blŭng xơnăm truh dang ei, hnam trưng hlôi lơ 'măng pơtruh hla bar ăn Anih Pơtho Pơhrăm dêh char Gia Lai păng Anih axong jang dêh char Gia Lai hơlen lăng, mă lei tam mă đei xek tơlang. Đei băt, tơdrong tơm adar kla jên tơgŭm ăn bơngai pơtho tơ̆ hnam trưng THPT Pleime noh kơyuơ Anih Pơtho Pơhrăm adar iŏk akŏm Tơchơ̆t đơ̆ng Anih jang Kon kông găh pơkăp hơnăn dôm thôn tơnap tap hloh kơ tơring kon kông păng groi kông jăl xơnăm 2021-2025. Tơdrong mă âu pơm ăn ưh kơ tom hơmet pơkăp tơgŭm lơ̆m 6 khei jê̆ đĭ xơnăm 2021 ăn kang ƀô̆, bơngai pơtho kơ hnam trưng THPT Pleime.