Kiơ̆ tơroi, tơdrong jang kŏng ngĭp khei 8 kơ dêh char Gia Lai tŏk 6,8% pơtêng hăm khei năr ou sơnăm sơ̆; tơmang pơhiơ̆ đei hơmet tenh hăm 9,8 triu 'nu tơmoi, tŏk 16% ; Tơmam tĕch ăn teh đak đe đei yua hloh 2,18 tih đôlar, hơtŏ  3/4 tơdrong pơjao jang lơ̆m sơnăm. Tơmơ̆t lơ̆m jên mong khei 8 đei hloh 18.395 tih hlj. Mă thoi noh, tơdrong asong jên jang kăl tơ̆ Gia Lai 'nao đei hloh 60% tơdrong pơjao jang.

Lơ tơdrong ming man kăl adoi ƀơm tơhlăk tăk gah hla bar pơkăp hrŭ 'mong iŏk teh ming man păng tơdrong ming man. Hăm tơdrong đei ƀôh ou, ƀok Phạm Anh Tuấn, Kơdră Anih jang vei lăng kon pơlei dêh char Gia Lai pơgơ̆r dah akŏm ăn tơdrong ming man dôm tơdrong kăl hloh. Kơdră kơ rim anih jang, rim tơring athei kơtă pơgơ̆r, hơlen lăng rim tơdrong tơlĕch jang; chih akŏm tơdrong asong jên jang hơdah kiơ̆ rim jăl jang vă tơtom pơklaih tơnap tap.