Hop akŏm kơyuơ Ƀô̆ trưởng Anih tơm Axong jang Việt Nam Nguyễn Chí Dũng păng Ƀô̆ trưởng Anih tơm jang Tĕch pơdro păng Tơmang pơhiơ̆ Australia Don Farrell atŭm pơgơ̆r. Tơ̆ hop akŏm, Ƀô̆ trưởng 2 păh hlôi pơma đam vă tơlĕch dôm trong jang hơtŏk pran tơbôl jang mŭk drăm Việt Nam - Australia, atŭm hăm noh sơkơ̆t hơdăh tơdrong pơm kiơ̆ Tơchơ̆t Hơtŏk jang hadoi mŭk drăm păng tơdrong jơnei đơ̆ng hop akŏm grŭp jang găh  ODA, FDI păng tĕch pơdro. Atŭm hăm noh, tơmơ̆ng nơ̆r tơgop, hơvơn đơ̆ng anih jang mŭk drăm yuk trong hơlâu Việt Nam păng Australia vă hơtŏk tơdrong jang tĕch pơdro hơtŏk kơjăp xơđơ̆ng. 'Nguaih kơ noh, 2 păh hlôi pơma đam găh jang hadoi kơ 2 teh đak lơ̆m dôm tơdrong jang lơ teh đak păng lơ̆m tơring nhen ASEAN, APEC, WTO, RCEP, CPTPP. Hop akŏm pơih đei trong pơm jang hơtŏk tơ-iung 'nao ăn tơbôl jang mŭk drăm Việt Nam- Australia.