Giĕng hơtuch khei 8, ƀok thây kô Hnam trương jăl ƀar păng Jăl pêng  Lê Hữu Trác yak năm ngôi hăm ŭnh hnam bre pơmai oh Thị Chúc, Thị Yêm, hơdrung M’Nông (pơlei Tân Bình, tơring Đak Ngo, apŭng Tuy Đức, dêh char Dak Nông). Bre oh tŏk bŏk tơgŭm ŭnh hnam choh ‘ngiet, prôi phŏng ăn mir chehphe. Ŭnh hnam đe oh găh ŭnh hnam dơnuh, lăp hơdrô̆ ƀă ‘noh bơngai jang sa, mĕ ‘noh jĭ jăn păn mĭnh hơnih, găh ‘nhŏng ‘noh jĭ jăn đơ̆ng gre tơ̆m. Oh Thị Chúc chhưu jơhngơ̆m mưh rim ƀok thây kô năm ngôi, hơlêm. “Ŭnh hnam nhôn tơnap tap, đei ƀok thây kô, mĕ ƀă pơtho khan vă kơ ĭnh năm hŏk dơ̆ng. Sơnăm hŏk ‘nao ĭnh hơmet tôm bơ̆n hla bơar bơih. Ĭnh gô hơdrin hŏk pơhrăm kiơ̆ nơ̆r mĕ ƀă chă pơtho ăn.”

Ƀok Điểu Thắng, ƀă bre pơmai oh Thị Chúc hăm Thị Yêm tơbăt, bre kon drŏ kăn hlôi 15 sơnăm vă jê̆ jing bơngai jang tơm lơm ŭnh hnam, mă lei ƀok hơnơ̆ng chă pơtho khan athei kon hơ ‘lơ̆p hơdrin năm hŏk vă tơdrong hơrih sa hơnô̆ hơnăp kơnh dă ƀiơ̆ mơmat tat ƀiơ̆. Gơnơm đei trong jang tơgŭm djru đơ̆ng Đảng, Teh đak kơna kon hơ ‘lơ̆p ƀok hoei pơdơ̆h hŏk pơlôh mơlônh.“Ŭnh hnam bơ̆n tơnap tap, oei hơtăih kơ hnam trương dơ̆ng, jei gơnơm tơdrong lăng ba đơ̆ng Đảng, Teh đak, hnam trương, tơgŭm ăn đe hăp đei kon jên sŏng sa, kon jên chă yơ yak. Ba jei hơdrin chă pơtho khan ăn đe hăp hơdrin hŏk pơhrăm vă kơ băt kơchư vă tơdrong hơrih sa hơnô̆ hơăp kơnh dă ƀiơ̆ mơmat tat ƀiơ̆.”

Ƀok Nguyễn Thế Hiệt, Kơdră chĕp pơgơ̆r Hnam trương Jăl ƀar-Jăl pêng Lê Hữu TRác, tơring Đak Ngo, apŭng Tuy Đức, dêh char Dak Nông tơbăt, tơ̆ tơring tơnap tap, lơ hŏk tro hlôi jing bơngai jang sa tơm mưh ‘nao lăp 15-16 sơnăm. Vă vei kơjăp măt bơngai hŏk tro năm hŏk, khul kơdră chĕp pơgơ̆r păng rim ƀok thây kô hơnơ̆ng năm tơ̆ pơlei pơla chă pơrô̆ hơvơn đe oh năm hŏk. Mưh năm pơrô̆ hơvơn, rim ƀok thây kô tơroi tơbăt ăn rim tơdrong jang tơgŭm djru đơ̆ng Đảng, Teh đak ‘măn ăn hŏk tro tơring atăih yăih, tơring kon kông; tơgŭm ăn mĕ ƀă hŏk tro, đe hŏk tro băt hlôh ƀôh hơdăh tơdrong kăl lơ̆m hŏk pơhrăm hăm tơdrong hơrih sa.“Khul kơdră chĕp pơgơ̆r hnam trương atŭm hăm rim ƀok thây kô vei lăng lăm hok, atŭm hăm iung jang hơdoi hăm rim kơdră pơlei, kơdră chĕp pơgơ̆r tơring năm truh chă pơrô̆ hơvơn đe oh năm hŏk. Găh tơdrong tơgŭm djru ‘noh tơring tơnap tap kăl đei 2 trong tơgŭm djru kiơ̆ Tơdrong tơchơ̆t 81 tơgŭm djru kon jên hŏk pơhrăm păng Tơdrong tơchơ̆t 116 tơgŭm ăn phe, kon jên sŏng sa, jên oei sa ăn rim đe oh, kơna tôch kơ ‘lơ̆ng.”

Ƀok  Phan Thanh Hải, Kơdră chĕp pơgơ̆r Hơnih vei lăng Hnam trương pơtho pơhrăm dêh char Dak Nông tơbăt, dêh char lăng kơjăp truh tơdrong hŏk tro tơring ataih yăih, tơring kon kông. Hơmet ăn sơnăm hŏk ‘nao, hơnih jang pơtho pơhrăm iung jang hơdoi hăm khul jang chinh trĭ tơring năm truh rim pơlei pơla vă băt hơdăh tơdrong păng chă pơrô̆ hơvơn hŏk tro năm hŏk. Dôm hok tro ŭnh hnam tơnap tap hơnih gô tơchă trong tơgŭm djru. Trong jang kơ hơnih jang vei lăng pơtho pơhrăm dêh char ‘noh ưh kơ lê̆ hŏk tro ayơ pơdơ̆h kơ hŏk kơ yuơ ŭnh hnam tơnap tap.

Hrei ou rim trong bơ̆ jang tơgŭm djru ăn hŏk tro tơring hơtăih yăih, tơring kon kông kiơ̆ Tơdrong tơchơ̆t 81 sơnăm 2021 đơ̆ng Khul kơdră teh đak tŏk bŏk tơlĕch jang ‘lơ̆ng tơ̆ dêh char Dak Nông. Lơ̆m rim sơnăm hŏk 2022-2023 păng 2023-2024 hlôi đei hloh 14.000 ‘nu hŏk tro lơ̆m dêh char sơng iŏk đei tơdrong tơgŭm djru găh kon jên sŏng sa, jên oei sa, tơgŭm djru kon jên hŏk pơhrăm vă jê̆ 21 ti hlak jên. Ƀok Phan Thanh Hải tơbăt.“Lơ̆m dôm sơnăm ou ki, rim trong bơ̆ jang tơgŭm djru đơ̆ng Trung ương păng tơring lăng ba kơjăp truh hăm kôn mon kon sau, đe hŏk tro oei tơ̆ tơring tơnap tap, tơring kon kông. Mă kăl đei 2 Tơdrong tơchơ̆t trŏ lăp hloh ‘noh Tơdrong tơchơ̆t 116 păng Tơdrong tơchơ̆t 81 đơ̆ng Khul kơdră chĕp pơgơ̆r Teh đak. Tơdrong tơgŭm djru ou hlôi trŏ lăp, tơgum djru, hơlêm ăn rim đe oh tơring hơtăih yăih, mă kăl ‘noh đe oh tơring kon kông đei rơvơn năm hŏk pơhrăm, pơm dă ƀiơ̆ đei hŏk tro hut hŏk nhen dôm sơnăm hơdrol.”

Dôm năr ou, hŏk tro oei tơ̆ tơring hơtăih yăih, tơring kon kông kơ Dak Nông pơma hơdrô̆, Tây Nguyên pơma atŭm tŏk bŏk rơ ông rơ ang năm tơ̆ hnam trương dơ̆ng. Atŭm hăm tơdrong hơdrin đĭ ai đơ̆ng hơnih bơ̆ jang vei lăng hnam trương pơtho pơhrăm, kơ rim ƀok thây kô pơtho tơklep kơjăp hăm rim pơlei pơla, rim tơdrong tơchơ̆t tơgŭm djru đơ̆ng Đảng, Teh đak tŏk bŏk tơgŭm djru tôch ‘lơ̆ng hơ iă tơgŭm ăn đe oh yak hloh tơnap tap yak truh hăm tơdrong hơrih sa ‘lơ̆ng rŏ hơbŏ nhen hloh.