Đĭ đăng 10 apŭng, plt kơ dêh char Kon Tum hrơ̆ch pơgơ̆r lêh pơjao, sơng iŏk linh til pơgê ‘năr 13/2. Lơ̆m kơsô̆ hlŏh 980 ‘nu druh dăm Kon Tum năm pơm linh, vei lăng teh đak đei 800 ‘nu bơngai năm pơm ƀô đô̆i păng hlŏh 180 ‘nu bơngai pơm công an. Lơ̆m noh, linh hle bơngai kon kông đei hlŏh 80%.

Til pơgê ‘năr 13/2 mơ̆n, hlŏh 2.800 ‘nu linh hle tơ̆ dôm tơring lơ̆m dêh char Gia Lai vang năm pơm linh ‘năi; lơ̆m noh đei 2.406 ‘nu bơngai năm pơm ƀô đô̆i păng 469 ‘nu bơngai pơm công an. Đĭ đăng linh hle âu vă bơ̆ jang, pơtâp pơhrăm tơ̆ dôm kơđông linh đei: Quân khu 5, Quân đoàn 34, Anih chĕp kơ̆l pơgơ̆r ƀô đô̆i vei lăng tơring sơlam dêh char Gia Lai, Anih chĕp kơ̆l pơgơ̆r khul linh dêh char Gia Lai, Sư đoàn khul linh gre păr 372 (Khul linh tơblăh tang găn gre păr), Công an dêh char Gia Lai.

Atŭm hăm dôm jĭt rơbâu tơdăm tơ̆ lơ dêh char, pơlei tơm lơ̆m jơ̆p teh đak, pơgê năr 13/2, hloh 3.000 'nu tơdăm tơ̆ Đăk Lăk năm pơm ƀô đô̆i. Tơ̆ anih pơjao – iŏk tơdăm pơm linh tơ̆ pơlei tơm Buôn Ma Thuột, đei 359 'nu tơdăm năm pơm linh. Kơdih chih hla bar apinh năm pơm linh ah 'măng mă âu, linh 'nao Y Đam Sam Niê (bơngai ÊĐê) tơ̆ phương Ea Tam, pơlei tơm Buôn Ma Thuột tơroi: “kơdih po inh athei hơdrin găn hloh dôm tơdrong tơnap tap lơ̆m anih linh, pơhrăm mă tơnăp vă vei lăng pơlei pơla, teh đak”.

Atŭm hăm pơlei tơm Buôn Ma Thuột, lêh pơjao – iŏk tơdăm pơm linh đei pơgơ̆r kăp gĭt tơ̆ 14 apŭng, thĭ xah tơ̆ dêh char Đăk Lăk. Jơ̆p dêh char đei 3.036 'nu tơdăm năm pơm linh lơ̆m 'măng âu, lơ̆m noh đei 160 'nu tơdăm hŏk đang đăi hŏk, kao đẳng, trung kâ̆p; lơ bơngai noh đảng viên.

‘Măng âu, dêh char Đắk Nông đei 1.158 ‘nu druh dăm năm pơm lĭnh. Lơ̆m noh đei vă jê̆ 5% druh dăm đei hŏk đang cao đẳng păng đại học. Đe druh dăm gơh hơgei kơ dêh char Đắk Nông mơ̆t pơm lĭnh ‘măng âu bơ̆jang kiơ̆ hơnăp jang khŭl lĭnh tơ̆ dôm anih jang ‘noh Lữ đoàn 234 - Quân đoàn 34; Sư đoàn 2 - Quân khu 5; Trung đoàn Bộ binh 994 – Anih chĕp kơ̆l Khŭl lĭnh dêh char Đắk Nông; Anih chĕp kơ̆l pơgơ̆r ƀô̆ đô̆i vei lăng tơring sơlam dêh char Đắk Nông păng Công an dêh char Đắk Nông.

Kŭm lơ̆m pơgê ‘năr 13/2 mơ̆n, hlŏh 1.200 ‘nu druh dăm tơ̆ dêh char Lâm Đồng hlôi năm pơm lĭnh, lơ̆m noh đei 535 ‘nu lĭnh hle bơngai kon kông. Lơ̆m kơsô̆ âu đei 23 ‘nu lĭnh hle ‘noh đảng viên. Dôm druh dăm âu năm jang hơnăp jang tơ̆ dôm anih jang găh Anih tơm vei lăng khŭl lĭnh păng Quân khu 7.