Dôm năr lêh Quốc khánh, trong hơyuh Radiô Nơ̆r pơma Việt Nam vơ vak hưch hanh hơmanh bơnê atŭm hăm jơ ‘năr chơt hơ iă 80 sơnăm Têt pơm tơm kơdih kơ teh đak. Tơ̆ Tây Nguyên, atŭm hăm rapor dôm tơdrong pơre nơ̆r teh đak, kon pơlei oei chơt hơ iă hloh dơ̆ng mơ̆ng đei kơtơ̆ng dôm tơdrong tơroi, joh hơri ‘lơ̆ng rŏ đơ̆ng kơdih pơlei pơla bơ̆n ‘noh jĭ dôm nơ̆r hơri, jơva chĭng chêng djơ djrĭng djơ djrăng vang yak hơdoi lơ̆m jơ ‘năr chơt hơ iă sơng năr lêh păng hơpơi ‘meh vă đei tơdrong ‘lơ̆ng rŏ hơbŏ nhen hloh lơ̆m hơnô̆ hơnăp kơnh. Nghệ sỹ nhân dân Y San Aliô, oei tơ̆ ƀuôn Niêng, tơring Ea Nuôl, dêh char Dak Lăk tơbăt:“Sơ̆ mưh chă yak tơ̆ ou tơ̆ to dăh mă năm tơ̆ hơtăih plăih kơ jung, ba hơnơ̆ng chĕp ba radiô iĕ vă mơ̆ng brŏ FM, hơ iă dêh, ba mơ̆ng hơnơ̆ng. dang ei chăl hle roi gơh jơgei hloh bơih nei, ‘noh jei gơ̆h mơ̆t lăng  kiơ̆ lơ̆m internet, iok yoa wifi, sa roi rơvơn hloh kơ sơ̆ tơpă mơ̆n. Ưh khan lăp hơdrô̆ nơ̆r Êđê mă lei truh hloi nơ̆r Mnông, Jarai, nơ̆r Anh, nơ̆r Phalăng ba jei hơnơ̆ng chă mơ̆ng. Ĭnh jĭ bơngai jang găh hơsoang kơna mơ̆ng brŏ, mă kăl dôm tơdrong rapor joh hơri ĭnh jei đei dơ̆ng lơ tơdrong vă pơjing tơdrong joh hơsoang păng tơchăr iŏk dôm tơdrong hơ iă, dôm tơdrong ‘nao kơ rim tơdra joh hơri kơ rim teh đak”.

Đơ̆ng sơnăm 1993,  Radiô Nơ̆r pơma Việt Nam pơjing Hơnih oei tơ̆ tơring Tây Nguyên, bơ̆ jang păng pơre nơ̆r lơ̆m trong hơyuh rapor teh đak rim tơdrong rapor nơ̆r kon kông. Hrei ou Radiô tŏk bŏk rapor rim năr 6 nơ̆r kon kông ‘noh Ê Đê, M’nông, Jarai, Kơ Ho, Ba Na, Xơ Đăng. ‘Nou hlôi jing “tơdrong hơ iă ăn jơhngơm đon” joăt joe, tơgŭm ăn kon pơlei băt hơdăh găh tơdrong choh jang sa, trong jang sa hle, adoi đei mơ̆ng dôm tơdrong hơri, tơdrong tơroi kră sơ̆, tơdrong oei sa joăt joe sơ̆ ki hăm nơ̆r hơdrĕch hơdrung kơdih. Mŏ H’Thêl, oei tơ̆ Sar Pa, tơring Thuận An, dêh char Lâm Đồng tơbăt:“Ŭnh hnam nhôn joăt mơ̆ng Brŏ đơ̆ng sơ̆ bơih, mĕ ƀă ĭnh ngăl mơ̆ng kơna ba jei chă mơ̆ng hơnơ̆ng. Dang ei ĭnh ngăl chă mơ̆t lăng lơ̆m điên thoăi kơna tôch rơvơn, năm tơ̆ yơ ba jei plôih điên thoăi chă mơ̆ng, lăng lơ̆m facebook, ĭnh ‘meh mơ̆ng hloh găh tơroi tơdrong kră sơ̆ hăm nơ̆r M’nông. Mơ̆ng brŏ ba băt lơ tơdrong ‘nao, hŏk lơ tơdrong hơ iă, mă kăl đei mơ̆ng hăm nơ̆r hơdrung bơ̆n dơ̆ng. Ĭnh hơpơi ‘meh vă nơ̆r M’nông lơ̆m Radiô Nơ̆r pơma Việt Nam đei lơ tơdrong rapor tơdrong pơrô̆ pơrôp, pơtho khan ăn kon pơlei, vă kon pơlei mơ̆ng păng atŭm dih băl vang vei răk tơƀăk mong tơdrong oei sa joăt joe sơ̆ ki kơ hơdrĕch hơdrung bơ̆n”.

Jĭ hơnih bơ̆ jang chih kơtơ̆ng ang Trung ương oei lơ̆m tơring, ‘ngoăih tơroi tơbăt kơtơ̆ng ang, tơbăt hơdăh dôm tơdrong hơrih sa, jang sa, chinh trĭ, tơpôl hăm rim tơdrong chih ou to kiơ̆ lơ trong, VOV Tây Nguyên oei hơdrin hyup răk ƀai tôn chĭng chêng, tơdrong hơri, tơdrong tơroi kră sơ̆; chă tơchĕng khoa hŏk tơgŭm ăn tơblơ̆ nơ̆r păng pơre nơ̆r kon kông. Gơnơm đơ̆ng noh, rim tơdrong tơroi kơ Radiô roi năr roi tơjê̆ hloh, tơklep hloh hăm tơdrong oei sa kơ pơlei pơla, pơm hơtŏk jơhngơ̆m đon vang vei răk tơƀăk mong tơdrong oei sa joăt joe ‘lơ̆ng rŏ sơ̆ ki. Nghệ sỹ ưu tú Y Phôn Ksơr, oei tơ̆ phường Buôn Ma Thuột, dêh char Dak Lăk tơbăt:“Mưh mơ̆ng Radiô Nơ̆r Pơma Việt Nam tơ̆ Tây Nguyên, ba ƀôh kăl chih răk, chih tơlĕch, hyup iŏk dơ̆ng rim nơ̆r ou to đơ̆ng rim nghê̆ nhân lơ̆m pơlei pơla, ‘noh jĭ pơhngol, jơhngơ̆m klơm klak kơ tơdrong joh hơri, tơdrong oei sa ‘lơ̆ng rŏ, tơdăh lê̆ hiong hiơt lei ‘mêm dêh”.

Đơ̆ng rŏng 80 sơnăm atŏk tơ iung, Radiô Nơ̆r Pơma Việt Nam hlôi tơpă jing gơng tơroh kloh klĕch dih băl, lang să tơdrong oei sa ‘lơ̆ng rŏ đơ̆ng pơlei pơla truh tơ̆ teh đak. Hơdrô̆ VOV Tây Nguyên, đơ̆ng rŏng 32 sơnăm bơ̆ jang, hlôi sơkơ̆t hơdăh hơnăp jang gĭt kăl lơ̆m vei răk nơ̆r pơma, tơdrong oei sa joăt joe ‘lơ̆ng rŏ kơ hơdrĕch hơdrung. Phó giáo sư Tiến sỹ Buôn Krông Tuyết Nhung, Hnam trương Đăi hŏk Tây Nguyên, hơlen:“Kiơ̆ kơ ĭnh hlôh, adoi jĭ mĭnh ‘nu bơngai Êđê, hloh 75% rim tơdrong kơtơ̆ng ang kơ VOV hlôi tơlĕch ăn jơnei, đei ƀơm kơtang ‘lơ̆ng hơ iă truh jơhngơ̆m đon hlôh vao kơ kon pơlei, mă kăl ‘noh rim tơdrong đei ƀơm truh tơdrong oei sa kơ ‘năr, lơ̆m ou đei kiơ̆ yok rok jơ̆ng tơdrong oei sa joăt joe ‘lơ̆ng rŏ sơ̆ ki. ‘Moi kiơ̆ dôm kơtơ̆ng ang hăm nơ̆r hơdrĕch hơdrung bơ̆n, đei ƀơm truh rim tơdrong kơ VOV, kon pơlei sa roi đei pơm hơtŏk tơdrong hơrih sa ‘lơ̆ng hơ iă hloh dơ̆ng lơ̆m tơdrong đei sơng iŏk trong bơ̆ jang, tơgŭm djru đơ̆ng teh đak. ”

Kiơ̆ kơ ƀok Nguyễn Đình Trung, Bí thư Đảng dêh char Dak Lăk, 6 tơdrong rapor nơ̆r kon kông tŏk bŏk rapor ‘noh jing mĭnh hơyak pran kơdih kơ VOV Tây Nguyên. Rim tơdrong rapor ou to hơnơ̆ng tơplih ‘nao, atŏk kơtang pơtho tơbăt găh trong bơ̆ jang tơgum djru kon kông, găh dôm tơdrong jang tơm teh đak păng gô đei dêh char tơlĕch jang. Kiơ̆ đơ̆ng noh tơgop pơm hơtŏk jơhngơ̆m đon kon pơlei tơgoăt tơgoăl dih băl kơjăp, vei kơjăp tơdrong oei sa joăt joe ‘lơ̆ng rŏ sơ̆ ki, tơ iung pơjing pơlei pơla păng dêh char sa roi pơdrŏng ‘lơ̆ng liĕm. “Atŭm hăm teh đak, Dak Lăk bŏk bŏk yak mơ̆t lơ̆m chăl atŏk tơ iung ‘nao. Ba tôch hơmŏ lơ̆m khul bơ̆ jang chih kơtơ̆ng ang kơ Radiô Nơ̆r pơma Việt Nam oei tơ̆ Tây Nguyên gô hơnơ̆ng pơm hơtŏk ‘lơ̆ng jơhngơ̆m đon chinh trĭ, jang kiơ̆ ‘lơ̆ng hơnih jang kơtơ̆ng ang kăl, tơm dơnơm kơ Đảng, Teh đak, hơnơ̆ng đei lơ tơdrong tơgop lơ̆m tơdrong tơ iung pơjing, atŏk tơ iung dêh char Dak Lăk păng tơring”.

80 sơnăm ou ki, trong hơyuh Nơ̆r pơma Việt Nam hlôi tơgoăt pơlei pơla hăm teh đak, vei kơjăp păng lang să tơdrong oei sa ‘lơ̆ng rŏ rim hơdrĕch hơdrung Tây Nguyên lơ̆m jăl ‘nao, Radiô hơnơ̆ng sơkơ̆t hơdăh hơnăp jang pơm jŭk yuk trong hơlou, mĭnh păh tơroi tơbăt dôm tơdrong kơtơ̆ng ang tơm, adoi yak hơdoi hăm kon pơlei pơla rim hơdrĕch hơdrung lơ̆m trong vei răk tơƀăk mong tơdrong oei sa ‘lơ̆ng rŏ joăt joe sơ̆ ki păng atŏk tơ iung kơjăp ‘lơ̆ng.