Hơnih pơdă să vă jê̆ 500m² kơ VOV tơ̆ Hơnih pơdă “80 sơnăm iung yak Pơm tơm kơdih-Rơngei hiôk hian-Hơnŭk hơnoa” tơƀôh tơbăt dơ̆ng prăt chăl sơnăm 80 sơnăm yak hơdoi păng atŏk tơ iung atŭm hăm teh đak. VOV hlôi akŏm jơhngơ̆m đon, kơrŭn đŏ ai đơ̆ng pơ đĭ khul chih kơtơ̆ng ang, khul chih hơmet, bơngai jang kih thuơ̆t, khul jŏh hơri păng bơngai jang hlôi pơjing đei hơnih pơdă tơbăt dơ̆ng rim hơyak kăl kơ Radiô Nơ̆r pơma Việt Nam, nhen rapor Nơ̆r tơchơ̆t pơm tơm kơdih 2/9/1945, tơdrong kơtơ̆ng ang jơnei rơngei Điện Biên Phủ, Jơnei tih tên pơyan puih mak 1975 ... Dôm hơyak gĭt kăl lơ̆m prăt chăl sơnăm nuih mơng pran kơtang kơ teh đak. Ƀok Phạm Mạnh Hùng – Kơ iĕng Kơdră chĕp pơgơ̆r Radiô Nơ̆r pơma Việt Nam tơbăt:“Dôm hơyak gĭt kăl adoi nhen lơ̆m khei ‘năr tơplih ‘nao kơ Đảng, khei ‘năr atŏk tơ iung găh tôm tong, khoa hŏk-kmăi kmŏk-chĕp pơgơ̆r kơ Radiô tơklep kơjăp, yak hơdoi hăm chăl sơnăm gĭt kăl dăr sơnăm kơ teh đak lơ liơ ‘noh jei tơƀôh tơbăt hơdăh lơ̆m hơnih pơdă kơ Radiô Nơ̆r pơma Việt Nam. Mưh kon pơlei năm lăng hơnih ou ‘noh jei ƀôh hơdăh găh chăl sơnăm atŏk tơ iung 80 sơnăm ou ki kơ Radiô Nơ̆r pơma Việt Nam, đơ̆ng ‘măng rapor blŭng a lơ̆m năr 7/9 sơnăm 1945 truh chăl sơnăm tơplih ‘nao hrei ou. Lơ̆m mĭnh chăl sơnăm gĭt kăl atŏk tơ iung teh đak jei đei vang yak hơdoi hăm tơdrong vang iung jang đơ̆ng Radiô Nơ̆r pơma Việt Nam lơ̆m tơdrong jang kĕch mang kơ hơdrĕch hơdrung”.

Ƀok Phạm Mạnh Hùng jei sơkơ̆t hơdăh: Lơ̆m prăt jơ ‘năr pơdă, VOV gô ăn kang ƀô̆, bơngai chih kơtơ̆ng ang, dôm bơngai joh hơri chă pơma dơnuh  tơroi tơbăt hơdăh găh tơdrong bơ̆ jang, hơlen băt găh chăl sơnăm ƀĕnh ƀang tơdrong ‘lơ̆ng rŏ hưch hanh hơmanh bơnê kơ Radiô Nơ̆r pơma Việt Nam.“ ‘Moi kiơ̆ rim trong pơgơ̆r phara dih băl păng mă kăl ‘noh mưh kon pơlei năm lăng hơnih pơdă gô đei hơrih atŭm hăm jơva nơ̆r pơma Việt Nam, ƀôh hơdăh jơ ‘năr gĭt kăl ‘moi kiơ̆ pơdăh VR găh Năr 2 khei 9 tơ̆ Cham să Ba Đình, mưh Ƀok Hô đŏk nơ̆r tơchơ̆t Pơm tơm kơdih; dăh mă dôm chăl sơnăm gĭt kăl ou to ‘moi kiơ̆ nơ̆r rapor. Nhôn gô tơroi tơbăt dôm trong jang hle kơ Radiô Nơ̆r pơma Việt Nam, nhen: Báo điện tử Nơ̆r pơma Việt Nam, Báo điện tử VTCNews, kênh rapor Trong gre nơnăm păng đei kơtơ̆ng ang hle ‘nao pơjing ‘noh kơtơ̆ng ang trong nơnăm Trong đak; jei chă lăng dôm tơdrong ou to mă hrei ou đei ƀôh lơ lơ̆m bơ̆ jang kơsô̆”.

Hơnih jang Pơdă “Tơdrong jơnei teh đak-Jăl trong 80 sơnăm iung yak Pơm tơm kơdih-Rơngei hiôk hian-Hơnŭk hơnoa”tơ̆ Hơnih tơm Pơdă teh đak (tơ̆ Đông Anh, Hà Nội) plôih ‘măng sơng hơvơn tơmoi năm tơmang lăng đơ̆ng năr 28/8 truh năr 5/9, hơmŏ ăn gô jing hơnih truh ‘lơ̆ng hơ iă hloh păng hưch hanh hơmanh bơnê kơtang hloh hăm rim răih kon pơlei Việt Nam.