Lêh sầu riêng hăm hơnăn “Sầu riêng Krông Pắc - Hơtŏk tơiung păng mơ̆t jang hơdai” pơgơ̆r đơ̆ng gơmăng ‘năr 31/8 truh ‘năr 2/9 tơ̆ Hơnih kơdrơ̆m thị trấn Phước An păng 1,2 xăh lơ̆m apŭng Krông Pắc, dêh char Đắk Lắk. Hơdai hăm lêh pơih blŭng, lêh pơtôch hăm tơdrong prăh hơmlăi pơkao pơrŏ, lơ̆m jơ năr pơgơ̆r lêh gô pơgơ̆r dôm tơdrong jang nhen: Tơdrong pơlong kon pơlei jang chŭn mir pơm tơlĕch sầu riêng hơgei; Jơnŭm kơchơ roi tơƀôh tơmam OCOP; Năr tơmam sa dôm hơdrĕch hơdrŭng; lăng, sa sầu riêng tơ̆ pơgar... 

Vang yak hơdai hăm tơring lơ̆m tơdrong jang pơgơ̆r lêh sầu riêng tơ̆ Krông Păc, Anih jang ŭnh điên Đắk Lắk hlôi jang đang dôm trong jang pơtruh ŭnh điên sơđơ̆ng. Anih jang ŭnh điên hlôi dăr hơlen, hơlen lăng pơđĭ trong tơ ley ŭnh điên păng anih biến áp lơ̆m tơring; hơdai hăm bơ̆jang kiơ̆ pơm trong tơley ŭnh điên, anih biến áp gơh rơ rĭ păng hơmet ăn kơmăy pơih ŭnh điên hơmet hiă pơyua ăn dôm tơdrong jang lêh tơ̆ Cham să Tân An.