Truh ngôi hăm Khul tơguăt ƀơ̆r đon kơ đe ƀok chuơ ‘mêm kơ tĕh đak tơ̆ plt Cần Thơ, Phŏ Kơdră chĕp kơ̆l Kuô̆k hô̆i Trần Thanh Mẫn chơt hơiă, ‘nă hal tơ̆ hơnăp dôm tơdrong tơgop đơ̆ng đe ƀok chuơ, bơngai vei lăng Khul tơguăt ƀơ̆r đon kơ đe ƀok Chuơ ‘mêm kơ tĕh đak tơ̆ plt Cần Thơ lơ̆m khei ‘năr âu ki.

Atŭm hăm ‘nŏh, kon pơlei Khmer vang tơgop tôch lơ vă hơmet pơ ‘lơ̆ng lơ hnam chuơ; krao hơvơn bơngai kiơ̆ lui adrin choh jang xa, tĕch mơdro vă pơm hơtŏk tơdrong arih, sut pơđĭ pơngot, tơjur tơnuh hin; lui hăm hơnăp jang păng bưng ai đơ̆ng kơdih, đe ƀok chuơ, bơngai pơtho, vei lăng lui phât, đe achar kŭm hăm kon pơlei Khmer hơnơ̆ng đei lơ tơdrong tơgop ‘lơ̆ng hlŏh dơ̆ng ăn tơdrong tơguăt đĭ đăng hơdrĕch hơdrung, pơjing păng vei lăng Tĕh đak roi đunh roi pran kơjăp.