Lơ̆m jơ sơng Tổng Bí thư Đảng Cộng sản Tây Ban Nha, ƀok Trần Thanh Mẫn tơchĕng ‘lơ̆ng tơdrong jang tŏk đơ̆ng tơdrong pơvei 2 pang Việt Nam - Tây Ban Nha, ƀôh hơdăh kiơ̆ đơ̆ng tơdrong tơƀâp pơma nuh đơ̆ng kơdră chĕp kơ̆l 2 tĕh đak khei ‘năr âu ki.

Phŏ Kơdră Kuô̆k hô̆i Trần Thanh Mẫn pơma hơdăh Việt Nam ling lang chih răk, tơchĕng ‘lơ̆ng tơdrong Đảng Cộng sản Tây Ban Nha jĭ 1 lơ̆m dôm đảng Cộng sản mă blŭng tơ̆ Tây Âu pơjing tơdrong pơvei hăm Đảng Cộng sản Việt Nam, hơnơ̆ng tơguăt 1 ƀơ̆r đon, tơgŭm ăn Việt Nam lơ̆m tơdrong tơblăh, tơgar iŏk tơdrong rơngei ăn hơdrĕch hơdrung. Phŏ Kơdră Trần Thanh Mẫn hơpơi ‘mĕh tơdrong pơvei đơ̆ng 2 đảng roi đunh roi kơjăp ‘lơ̆ng hlŏh dơ̆ng, đei yoa hlŏh dơ̆ng ăn tơdrong pơvei jang hơdoi gĭt kăl đơ̆ng 2 tĕh đak.