Hnam trưng mâm non Pác Bó să truh 1.800m2  hăm 6 lăm hŏk, 1 pôm hnam pơm jang atŭm hăm minh ƀar anih jang tơgŭm nai. Mă tŏ ‘mi kial ưh đei ‘lơ̆ng sơđơ̆ng, ‘mi tih mă lei đơ̆ng rŏng jê̆ 3 khei tơlĕch ming man, hlôi keh đang hơdrol kơ sơnăm hŏk ‘nao. ‘Nâu jing tơdrong hơlêm tih tên hăm rim bơngai pơtho, đe hŏk tro păng kon pơlei xah sơlam teh Trường Hà, apŭng Hà Quảng, dêh char Cao Bằng păng adoi jing tơdrong kăl vă trưng Mâm non Pác Bó hơdrin đei iŏk jơnei nhen tơchơ̆t kơ teh đak lơ̆m khei năr truh.

Ƀơ̆t ‘măng âu, Phŏ Kơdră teh đak bơ̆n păng Khul kơpal hlôi truh soh nhang, plang pơkao tơ̆ Anih soi ƀlŏk kơ Ƀok Kơdră Hồ Chí Minh tơ̆ Anih soi ƀlŏk kăp gĭt Pác Bó, xah Trường Hà, apŭng Hà Quảng.