Ƀlep ƀơ̆t ‘măng năm bơ̆jang tơ̆ dêh char Bến Tre, kơsơ̆ 13/4, Phŏ Kơdră teh đak Võ Thị Ánh Xuân hlôi năm ngôi, bơ̆jang, asong tơmam ăn ŭnh hnam teh đak tơgŭm, ŭnh hnam dơnuh hin păng hơioh đei tơdrong arih sa mơmat tat tơ̆ apŭng Mỏ Cày Nam (dêh char Bến Tre)- pơlei pơla đơ̆ng tơdrong vang iung tơblăh 1960. Phŏ Kơdră teh đak Võ Thị Ánh Xuân hlôi apĭnh jet gia găh tơdrong arih sa, oei sa đơ̆ng kon pơlei lơ̆m tơring păng tơƀôh đon chơt hơiă ƀơ̆t lăng ƀôh pơlei pơla tơring gao roi ‘năr roi hơtŏk tơ iung.

Phŏ kơdră teh đak Võ Thị Ánh Xuân hlôi pơlung kang ƀô̆ păng kon pơlei Bến Tre pơma atŭm păng apŭng Mỏ Cày Nam athei hơnơ̆ng hơtŏk tơdrong joăt joe Nuih mơng đơ̆ng pơlei pơla kach mang “hơnih tơm” kơ tơdrong jang vang iung tơblăh sơnăm sơ̆, lơ̆m tơdrong jang pơm tơlĕch, pơm pơjing pơlei pơla roi ‘năr roi pơ drŏng ‘lơ̆ng. ‘Măng âu, Phŏ kơdră teh đak hlôi pơjao 50 tơpu tơmam ăn dôm ŭnh hnam dơnuh hin, ŭnh hnam đei kŏng hăm kach mang, 200 kơ suơ̆t hŏk ƀŏng ăn đe oh hŏk tro đei tơdrong arih sa mơmat tat păng 10 tŏ hnam ‘mêm mơ nat ăn kơ dôm ŭnh hnam teh đak tơgŭm tơ̆ apŭng Mỏ Cày Nam (dêh char Bến Tre).