Tơ̆ jơ bơ̆jang, Phŏ Thủ tướng Bùi Thanh Sơn hlôi mơ̆ng kơdră chĕp kơ̆l dêh char Cao Bằng roi tơbăt găh tơdrong hiong răm yua đơ̆ng ‘mi kial pơrăm, mă loi ‘noh jĭ kial hơbŭt kơsô̆ 3. Kiơ̆ kơ ‘noh, ‘mi kial đơ̆ng blŭng sơnăm truh dang ei hlôi pơm ăn Cao Bằng hiong răm hloh 248 ti hlak jên, hơdrô̆ ‘mi kial hơbŭt kơ sô̆ 3 đĭ pơm ăn 45 ‘nu lôch, 15 ‘nu rơka păng 8 ‘nu oei hiong dong, vă jê̆ 1.500 tŏ hnam, hloh 1.600 hek tar ƀa hơƀo đei hiong răm.

Phŏ Thủ tướng, Kơdră Anih tơm jang tơbôl Bùi Thanh Sơn athei dêh char Cao Bằng hơnơ̆ng tơ tĕnh tơchă bơngai hiong dong yua đơ̆ng ‘mi kial pơrăm; hơdai hăm tơ tĕnh hơmet pơ ‘lơ̆ng hiong răm đơ̆ng ‘mi kial, mă loi ‘noh jĭ tơdrong ưh kơ gơh năm vih vơ̆t yua đơ̆ng teh hơlih trong nơnăm hrei ‘nâu. Tơring kăl kơ jang ‘lơ̆ng tơdrong tơgŭm phe sŏng, tơmam sa, đak rơgoh, tơmam yua ăn kon pơlei tơring đei teh hơlih păng kon pơlei tơring ưh kơ gơh chă nơnăm.