Tơ̆ jơ sơng, Kơdră teh đak Võ Văn Thưởng tơƀôh đon lui ngeh Campuchia gô pơgơ̆r jơnei ‘măng pôk rơih Kuôk hô̆i khei 7/2023, hơnơ̆ng iŏk đei lơ jơnei tih tên lơ̆m tơdrong jang pơ jing teh đak Campuchia rơngei, hiôk hian, kon pơlei pơm tơm păng hơnŭk hơnoa. Việt Nam ling lang đĭ jơhngơ̆m lăng kăl păng ‘meh vă ưh kơ pơdơh hơtŏk loi dơ̆ng tơdrong pơvei “teh đak tơ jê̆ ‘lơ̆ng hơ iă, jang tơ bôl joăt joe, jang hơdai tôm tơdrong, kơ jăp đunh đai” hăm Campuchia. 

Phŏ Thủ tướng, Kơdră Anih tơm jang tơbôl Campuchia pơma hơdăh Campuchia ling lang lăng kăl tơdrong pơvei jang tơbôl păng jang hơdai gĭt kăl hăm Việt Nam. Hmach chơt hơiă kơ dôm jơnei tih jên mă kon pơlei Việt Nam iŏk đei lơ̆m tơdrong jang hơtŏk tơiung mŭk drăm - tơpôl; tơƀôh đon lui ngeh Việt Nam gô jang đang tơdrong hơgăt kơmăy kơ mŏk ‘nao lơ̆m sơnăm 2030. 

Tơ̆ Anih jang kơ Khul kơdră tĕh đak, Thủ tướng Phạm Minh Chính kŭm sơng Phó Thủ tướng, Kơdră tơm jang tơbôl păng jang hơdoi hăm apŭng plenh tĕh kơ tĕh đak Campuchia Prak Sokhonn. Vă tơdrong pơvei kơ 2 tĕh đak hơnơ̆ng tŏk ‘lơ̆ng, roi đunh roi đei yoa, Thủ tướng Phạm Minh Chính athei 2 păh akŏm jơhngâm bơ̆ jang đei yoa ‘lơ̆ng dôm tơdrong drơ̆ng nơ̆r tih, dôm tơdrong tơchơ̆t atŭm đơ̆ng 2 tĕh đak; hơtŏk tơdrong jang hơdoi, pơm trong tơƀưh băl, tơguăt tơdrong jang mŭk drăm đơ̆ng 2 tĕh đak, vang pơjing tơdrong jang mŭk drăm kơ dih, kơchăng hơbĕch hơbal hơdai hăm mât jang hơdoi hăm apŭng plenh tĕh đei yoa ‘lơ̆ng.

Lơ̆m sơnăm 2023 pơgơ̆r lơ tơdrong gĭt kăl tơ̆ Campuchia, lơ̆m nŏh đei Pôk rơih Kuôk hô̆i jăl VII, Đă ƀŏng lŏng tơplŏng kơ dâu Đông Nam Á ‘măng mă 32 (SEA Games 32) păng thi tơplŏng kơdâu ăn bơngai jo jăn Đông Nam Á (Para Games), Hop akŏm tih 3 tĕh đak Campuchia – Lào – Việt Nam ‘măng mă 12, Thủ tướng pơma hơdăh, kiơ̆ tơdrong kĕ jang đơ̆ng kơdih, Khul kơdră tĕh đak Việt Nam vă tơgŭm, roi tơƀôh dôm tơdrong kăl păng tơgŭm ăn Campuchia pơgơ̆r đang ‘lơ̆ng rim tơdrong ‘nâu.