Phŏ Thủ tướng Lê Minh Khái ăn tơbăt, khei adrol ki, ƀok păng Phŏ Thủ tướng teh đak Hàn Quốc Kyungho Choo hlôi drơ̆ng nơ̆r pơgơ̆r tơdrong hop akŏm Pơma đam găh jang hadoi mŭk drăm jăl Phŏ Thủ tướng Việt Nam – Hàn Quốc 'măng mă 2. Ƀar păh hlôi pơma đam drơ̆ng nơ̆r lơ tơdrong kăp gĭt vă hơtŏk jang tơbôl mŭk drăm kơ 2 teh đak. Phŏ Thủ tướng Lê Minh Khái lui ngeh, hăm tơdrong hlôh vao kơ po, NACF adoi gô jang hadoi kăp gĭt hăm Jơnŭm pơgơ̆r teh đak Việt Nam tơgŭm hơtŏk choh jang xa, tơring pơxĕl, kiơ̆ đơ̆ng noh tơgop lơ̆m hơtŏk mŭk drăm – tơpôl kơ Việt Nam.  Phŏ Thủ tướng Lê Minh Khái păng Ƀok Kơdră Lee Sung Hee duh pơma đam găh minh ƀar tơdrong đei tơrĕk truh pơgơ̆r akŏm kơchơ choh jang xa tơ̆ Pusan; tơdrong jang kơ anih mong jên NH Bank tơ̆ Việt Nam; hơtŏk tĕch răt tơmam drăm, tơmam choh pơtăm kơ 2 păh... vă hơtŏk tơdrong jang tơbôl kơ 2 teh đak găh tơdrong jang hadoi hơtŏk tơ-iung tơpă, đei jơnei tơnăp lơ̆m khei năr truh.