Tơdrong ming man jăl trong tih kơdâu renh Tân Phú – Bảo Lộc hơtaih 66km, pơkăp ăn 4 tong gre yak hadoi, hăm kơsô̆ jên asong ming man 17.200 tih hlj kiơ̆ pơkăp jang hadoi. Kiơ̆ tơchơ̆t tơlĕch pơm jang, gah jên Teh đak tơlĕch jang noh 6.500 tih hlj (đei jê̆ 38%), oei dôm yơ noh jên đơ̆ng dôm anih asong jang dah mă jên chă hơvơn đơ̆ng anih jang nai. Pơtoi kơ tơdrong jang âu noh ming man jăl trong tih Bảo Lộc – Liên Khương, hơtaih 73,6km, đei jên asong ming man 19.521 tih hlj. Lơ̆m noh, jên asong đơ̆ng teh đak 7.761 tih hlj (đei jê̆ 39,8%), oei dôm to noh jên asong đơ̆ng anih iŏk ming man păng hơvơn jên ming man đơ̆ng anih jang nai.   

Kiơ̆ kơ ƀok Trần Hồng Thái, Kơdră Anih jang vei lăng kon pơlei dêh char Lâm Đồng, kơyuơ jên asong đơ̆ng Teh đak asong tŏ sĕt, ưh đei jang kiơ̆ pơkăp vang tơjur pơyua noh tơdrong ming man ưh đei tơnăp, pơm tơjur tơdrong hơvơn asong đơ̆ng anih iŏk ming man păng dôm anih jang gah jên hu asong jang. Atŭm hăm noh, pơđĭ 2 tơdrong asong ming man đei hơlen adoi tơhlăk kơlih pơkăp iŏk yua tơmo kăp gĭt kiơ̆ Tơchơ̆t 866, tơbang năr 18/07/2023 đơ̆ng Thủ tướng teh đak. Ƀok Trần Hồng Thái tơroi: “Pơđĭ 2 tơdrong ming man adoi tơhlăk nhen băl, tơchơ̆t tơdrong jang kơ 2 anih ming man đei dêh char Lâm Đồng iŏk pơm jang păng adoi ‘meh tơlĕch jang hrôih vă trŏ hăm tơlĕch tơchơ̆t, păng gơh tơlĕch ming man lơ̆m sơnăm 2024 vă ah sơnăm 2025 noh jing sơnăm ming man tơm. Mă 2, jăl trong tih hơtaih ưh đei tơplih mă lei đei tơdrong tơplih lơ̆m tơchơ̆t asong jang, hơdrô̆ tơplih tơdrong iơ iĕ đĕch noh hơpơi ‘meh athei vei sơđơ̆ng tơdrong tơchơ̆t tơlĕch ming man”.

Vă pơklaih dôm tơdrong tơnap tap, tơhlak tơhlĭn âu, dêh char Lâm Đồng pơtruh nơ̆r hăm Thủ tướng teh đak hơlen asong thêm jên mong kơ Teh đak ăn dôm tơdrong ming man hăm kơsô̆ jên 3.332 tih hlj, lơ̆m noh 2.410 tih hlj ăn jăl trong Tân Phú – Bảo Lộc păng 922 tih hlj ăn jăl trong Bảo Lộc – Liên Khương. Atŭm hăm noh, asong ming man jăl trong tih Tân Phú – Bảo Lộc đei iŏk yua kiơ̆ asong pơyua tơjur, kiơ̆ tơchơ̆t lơ̆m Tơdrong 82 Luơ̆t Asong jang kiơ̆ tơchơ̆t jang hadoi.

Pơma ah jơ pơm jang, Phŏ Thủ tướng teh đak bơ̆n Trần Hồng Hà sơkơ̆t hơdah ưh đei hơtŏk jên mong kơ Teh đak hăm 2 tơdrong ming man âu. Mă lei, vă sek tơlang tơdrong tơnap gah jên hu, Phŏ Thủ tướng teh đak pơkăl, rim anih jang tơm, rim anih jang đei tơrĕk dah pơm hla bar pơtruh nơ̆r hăm Thủ tướng teh đak vă pơklaih tơhlăk tăk lơ̆m tơdrong hơvơn jên tŏk iŏk đơ̆ng anih mong jên. Kơlih kiơ̆ kơ tơchơ̆t oei yua dang ei, jên đơ̆ng anih asong ming man ưh đei truh  20% kơsô̆ jên asong ming man noh ưh kơ mah pơkăp ăn tŏk iŏk: “Inh pơtruh nơ̆r gah Jơnŭm pơgơ̆r teh đak noh Anih tơm jang Jên hu su kăk athei hơlen chih akŏm pơtruh ăn Thủ tướng teh đak hơlen lăng vă tơlĕch tơchơ̆t đơ̆ng Jơnŭm pơgơ̆r teh đak dah mă hơmet Tơchơ̆t 78, khei năr tơlĕch tơdrong jang âu roi hrôih roi ‘lơ̆ng. Kơlih dôm tơchơ̆t đơ̆ng Teh đak đei lơ tơplih, ưh đei drơ̆ng minh păng ưh kơ ‘lơ̆ng ăn tơdrong asong jang, jô̆ hloi hăm dôm anih iŏk ming man adoi nhen rim anih mong jên vang pơm jang, noh athei đei hla bar chih pơtruh ăn Thủ tướng teh đak vă dah pơgơ̆r pơm jang drơ̆ng minh, vă vei sơđơ̆ng ăn dôm tơchơ̆t đơ̆ng Jơnŭm pơgơ̆r teh đak”.

Gah dôm tơdrong asong ming man trong tih ƀơm tơhlăk lơ̆m tơring pơkăp sir tơmo gĭt, Phŏ Thủ tướng Trần Hồng Hà athei dêh char Lâm Đồng păng dôm anih iŏk ming man tơroi hăm dôm anih jang kơpal kơ jơnŭm pơgơ̆r teh đak vă pơtho pơm kiơ̆ dôm trong tơlĕch jang trŏ ƀlep.

Hơdrol kơ noh, ah jơ pơm jang, đe Kơdră Anih jang vei lăng kon pơlei dêh char Khánh Hòa hlôi tơroi gah tơdrong hơlen chih akŏm vă ming man Jăl trong tih Nha Trang – Đà Lạt. Kiơ̆ kơ noh, tơdrong ming man hăm trong hơtaih hloh 80km, pơkăp ăn 4 tong gre yak hadoi, kơdâu renh đơ̆ng 80 truh 100km lơ̆m minh jơ. Kơsô̆ jên asong ming man noh 25.000 tih hlj, kiơ̆ pơkăp jang hadoi PPP, pơkăp jang BOT đei teh đak tơgŭm jang, hăm kơsô̆ jên pơkăl noh 70% jên mong kơ Teh đak, oei dôm to noh jên đơ̆ng anih iŏk ming man; khei năr keh đang jên asong noh năr 26 khei 9. Ming man lơ̆m anih teh să  627ha, lơ̆m noh đei 409ha bri tơm, bri hơmŏ păng bri iŏk yua. Đơ̆ng rŏng iŏk yua dôm tơchơ̆t kih thuơ̆t nhen gơng pơtoi, chơnĕng pĕng găn... gô tơjur đei 125ha teh bri iŏk ming man.

Hăm tơdrong tơlĕch ming man trong tih âu, Phŏ Thủ tướng teh đak bơ̆n Trần Hồng Hà pơkăl 2 dêh char Khánh Hòa păng Lâm Đồng, Anih iŏk ming man Sơn Hải păng dôm anih jang tơm đei tơrĕk athei yak hadoi, akŏm hơlen chih akŏm keh đang tơchơ̆t kih thuơ̆t, tơchơ̆t khôi luơ̆t, mă kăl noh athei jô̆ mă hơdah gah jên hu su kăk.